लोकतान्त्रिक समाजवादी पार्टी (लोसपा)का अध्यक्ष महन्थ ठाकुरले केही दलले हतियारको प्रयोग गरेर देशमा परिवर्तन ल्याएको आरोप लगाएका छन् ।  
आइतबार मधेस आन्दोलनका सहिदहरूलाई माल्यार्पण गर्दै उनले आफ्नो पार्टीले जहिले पनि शान्तिपूर्ण आन्दोलन गरेर देशमा स्थापित भएको बताएका हुन् ।  

उनले  भने, ‘मधेसमा हामीले ६ महिनासम्म निरन्तर आन्दोलन गरेका थियौँ । आन्दोलनबाट धेरै नोक्सानीको सामना गर्नुपरेको थियो । हाम्रा पार्टीका धेरै नेता–कार्यकर्ता सहिद भइसकेका छन् । अहिले पनि धेरै नेता–कार्यकर्ता जेलमा छन्, कोही महोत्तरीको जेलमा छन् भने टीकापुर घटनापछि कोही थारू नेता धनगढीको जेलमा छन् । आन्दोलन आपराधिक आन्दोलन थिएनन्, लुटपाट, कुटपिट आन्दोलन पार्टीले गरेको थिएन । सधैँ शान्तिपूर्ण ढंगले आन्दोलन गरेका थियौँ, तर अरू पार्टीले हतियार उठाएर देशमा परिवर्तन ल्याएका हुन् । त्यो बेला धेरै धनजनको नोक्सान भएको थियो । बैंक लुटिएको थियो, गोदाम लुटिएको थियो र सबैभन्दा बढी मानवीय क्षति भएको थियो ।’

साथै उनले गोली चलाउन आवश्यक नभएको ठाउँमा समेत त्यो समय गोली चलेको बताए । उनले यतिका समयसम्म पनि कुनै प्रधानमन्त्रीले मधेस आन्दोलनको प्रतिवेदन सार्वजनिक नगरेको दुखेसो पोखे ।