नेपाली कांग्रेसकाे बुधबारका लागि तय भएकाे केन्द्रीय कार्यसमिति बैठक सरेको छ । बैठक भदौ १६ गतेका लागि सरेको कांग्रेसका मुख्यसचिव कृष्णप्रसाद पौडेलले विज्ञप्ति जारी गरेर जानकारी दिएका छन् । 

केन्द्रीय कार्यसमितिको बैठकको मिति परिवर्तन गरिएको जनाइए पनि बैठक सार्नुको कारण भने उनले खुलाएका छैनन् ।

साउन २३ गतेबाट सुरु भएकाे कांग्रेस केन्द्रीय कार्यसमिति बैठकमा विभिन्न ११ एजेन्डामा छलफल भइरहेकाे छ । बैठकमा पूर्वपदाधिकारी र पदाधिकारीबाहेकका नेताहरूले धारणा राखिसकेका छन् ।

गत फागुनमा सम्पन्न महासमिति बैठकमा महामन्त्रीद्वय गगन थापा र विश्वप्रकाश शर्माले पेस गरेका प्रतिवेदनमा केन्द्रित छ । महासमितिले बैठकमा पेस भएका प्रतिवेदन केन्द्रीय कार्यसमिति बैठकबाट परिमार्जन गरेर अनुमोदन गर्ने निर्णय गरेको थियो ।