युइएफए नेसन्स लिग फुटबलमा जर्मनीले सानदार जित दर्ता गरेको छ । गएराति सम्पन्न खेलमा जर्मनीले हंगेरीविरुद्ध ५–० गोल अन्तरको एकतर्फी जितत दर्ता गरेको हो ।

समूह तीनमा रहेको जर्मनीको जितमा निकलस फुलक्रग, जमाल मुसिएला, फ्लोरियन विट्ज, एलेक्जेन्डर पाभलोभिक र केइ हार्भाटेजले एक/एक गोल गरे ।

२७औँ मिनेटमा जमाल मुसिएलाको क्रसपासमा निकलस फुलक्रगले गोल गर्दै अग्रता दिलाए । पहिलो हाफमा एक गोल गरेको जर्मनीले दोस्रो हाफमा अरू चार गोल थप्यो । 

५७औँ मिनेटमा विट्जको पासमा मुसिएलाले गोल गर्दै अग्रता दोब्बर बनाए । अधिकांश समय हंगेरीविरुद्ध दबाब बनाएको जर्मनीले तेस्रो गोल ६६औँ मिनेटमा गर्‍याे ।

मुसिएलाको पासमा विट्जले डीबक्सभित्रबाट उत्कृष्ट गोल गरे । ​७७औँ मिनेटमा मुसिएलाकै पासमा एलेक्जेन्डर पाभलोभिकले गोल गरेपछि जर्मनी ४–० ले अघि बढ्यो ।

८१औँ मिनेटमा हंगेरीका विली ओर्वानले हार्भाटेजलाई डी बक्सभित्र फल गरेपछि पाएको पेनाल्टीलाई उनले नै गोलमा परिणत गर्दै जर्मनीलाई ५–० को फराकिलो जित दिलाए ।

यही समूहमा रहेको नेदरल्याण्ड्सले बोस्निया हर्ज गोभिनालाई ५–२ गोल अन्तरले पराजित गर्‍यो ।