चोटका कारण लामो समय विश्राम गरेपछि अर्जेन्टिनी स्टार लिओनल मेस्सी मैदान फर्किएका छन् । उनी आइतबार बिहान इन्टर मियामीबाट म्याच खेल्दै मैदान फर्किएका हुन् । 

मेस्सीले सानदार पुनरागमन गरे । अमेरिकी लिग सकर (एमएलएस) मा फिलाडेल्फियाविरुद्ध मियामीलाई ३–१ को जित दिलाउनेक्रममा मेस्सीले दुई गोल गरे । साथै, उनले एक असिस्टसमेत उपलब्ध गराए । यस्तै, अर्काे गोल लुइस स्वारेजको नाममा रह्यो ।

फिलाडेल्फियाका लागि माइकल उहरेले एक गोल गरे । खेलको दोस्रो मिनेटमै माइकलले गोल गर्दै फिलाडेल्फियालाई सुरुवाती अग्रता दिलाए । तर, स्वारेजको पासमा मेस्सीले २६औँ मिनेटमा गोल गर्दै खेललाई १–१ को बराबरीमा ल्याए । 

जोर्डी अल्वाले ३०औँ मिनेटमा उपलब्ध गराएको बललाई मेस्सीले सहजै पोस्टको दिशा दिए । यस्तै, मेस्सीले दिएको पासलाई सदुपयोग गर्दै स्वारेजले इन्जुरी समयमा तेस्रो गोल गरे ।  

२८ खेलबाट शीर्षस्थानमा रहेको इन्टर मियामीले ६२ अंक जोडेको छ । यस्तै, ५२ अंकसहित एफसी सिन्सिनाटी दोस्रो स्थानमा छ । पराजित फिलाडेल्फिया ३० अंकसहित २२औँ स्थानमा छ ।