स्पेनिस ला लिगामा बार्सिलोनाले लगातार पाँचौं जित निकालेको छ । पाँचौं जित निकाल्नेक्रममा बार्सिलोनाले गएराति सम्पन्न खेलमा जिरोनालाई ४–१ ले हरायो । 

बार्सिलोनाको जितका लागि लामिन यमलले दुई तथा डानी ओल्मो र पेड्रीले एक/एक गोल गरे । जिरोनाका लागि क्रिस्टियन स्टुआनीले गरेको एक गोल फर्काए । 

यमलले ३०औँ मिनेटमा पहिलो गोल गर्दै बार्सिलोनालाई सुरुवाती अग्रता दिलाए । उनले नै ३७औँ मिनेटमा व्यक्तिगत दोस्रो गोल गर्दै बार्सिलोलाई २–० ले अघि बढाए ।

खेलको ४७औँ मिनेटमा ओल्मोले गोल गर्दा बार्सिलोनाले ३–० को अग्रता पायो ।  

खेलको ६४औँ मिनेटमा पेड्रीले गोल गर्दै बार्सिलोनालाई ४–० को अग्रता दिलाए । खेल सकिन १० मिनेट बाँकी रहँदा स्टुआनीले जिरोनाका लागि सान्त्वना गोल फर्काए ।

८६औँ मिनेटमा बार्सिलोना १० खेलाडीमा समेटियो । फेरान टोरेसले रातो कार्ड पाएपछि बार्सिलोना १० खेलाडीमा समेटिएको हो ।  

यो जितसँगै बार्सिलोनाले ५ खेलबाट १५ अंक जोडेको छ । ऊ तालिकाको शीर्ष स्थानमा छ । बार्सिलोना दोस्रो स्थानको रियल मड्रिडभन्दा ४ अंकले अघि छ । 

पराजित जिरोना पाँच खेलबाट ७ अंकका साथ तालिकाको सातौं स्थानमा छ ।