नेपाली कांग्रेसका सभापति शेरबहादुर देउवाले ओली सरकारले सय दिनमा राम्रो काम गरेको बताएका छन् । शनिबार शुभकामना आदानप्रदान तथा जय नेपाल भक्तपुर स्मारिका लोकार्पण कार्यक्रमलाई सम्बोधन गर्दै देउवाले ओली सरकारले गजब काम गरिरहेको तथा अझै राम्रो काम गर्नेमा आफू विश्वस्त रहेको बताएका हुन् ।
उनले भने, ‘सय दिन बल्ल पुगेको छ ओली जीको प्रधानमन्त्री कार्यकालको । यहाँ मात्र होइन जहाँ पनि सय दिनको कामको सम्बन्धमा आलोचना प्रत्यालोचना सबै हुन्छ । हाम्रो समग्र सरकार छ । हामी सरकार भएको कारण मैले उहाँलाई भनेको होइन साँच्चै राम्रो काम गर्नुभएको छ । मलाई विश्वास छ । अझै यस्तै राम्रो काम गर्नुहुने छ । प्रजातन्त्रमा आलोचना हुनु स्वाभाविक कुरा हो । अरू पार्टीहरूले उहाँलाई आलोचना गरेका छन् । त्यो आलोचनाहरू पनि तथ्यपरक भएर सरकारले ध्यान दिने छ । म पनि ओली जी लाई प्रोत्साहन गर्ने छु । ’
साथै उनले यो देश ठूला दुई देशको बिचमा रहेकाले प्रधानमन्त्री ओलीले सबै कुरा ध्यानमा राखेर हरेक क्रियाकलापहरू गर्न सक्षम हुने बताए । साथै उनले आलोचनालाई पनि गम्भीरताका साथ लिएर अहिलेको सरकारले परिणाममुखी काम गरेर देखाउनुपर्ने बताए ।
फरकधारमा प्रकाशित कुनै समाचारमा तपाईंको गुनासो भए हामीलाई [email protected] मा इमेल गर्न सक्नुहुनेछ । यही इमेलमा तपाईंले आफ्नो विचार वा विश्लेषण, सल्लाह र सुझाव पनि पठाउन सक्नुहुनेछ । हामीसँग तपाईं फेसबुक, ट्विटर, इन्स्टाग्राम, युट्युबमा पनि जोडिन सक्नुहुन्छ ।
