गोरखा – बाबुराम भट्टराई नेतृत्वको नयाँ शक्ति पार्टीले संघीय समाजवादी फोरमसँग एकता गरेर समाजवादी पार्टी गठन गरेसँगै भट्टराईकै जिल्ला संगठनमा पहिरो गएको छ । पूर्वनयाँशक्ति पार्टीका केन्द्रीय परिषद् सदस्यसहित ४० कार्यकर्ता नेपाल कम्युनिस्ट पार्टी (नेकपा)मा प्रवेश गरेका छन् ।
फोरमसँगको एकताप्रति असन्तुष्टि राख्दै केन्द्रीय परिषद् सदस्य दिनेश तमुसहित जिल्ला पार्टी सदस्य सुमेन्द्र श्रेष्ठ, नरेश नराल, रवि राना, धनबहादुर तामाङ, सनक उपकोटीलगायत नेता–कार्यकर्ता शनिबार नेकपामा प्रवेश गरेका हुन् ।
नयाँ शक्ति पार्टीले देशको आर्थिक सामाजिक क्रान्तिको नेतृत्व गर्नेभन्दा झनै स्खलित हुँदै गएको आरोप लगाउँदै उनीहरू नेकपामा प्रवेश गरेका हुन् । नेकपामा प्रवेश गर्नेहरूमा जंग गुरुङ, प्रकाश कुँवर, नारान पुलामी, नरेश बराम, लेसन तामाङ, अमर गुरुङ, राजकुमार गुरुङलगायत छन् ।
गोरखाकाे सिराचोक गाउँपालिकाका अशोक गुरुङ, बिकल गुरुङ, अनुप गुरुङ, राजकुमार गुरुङ, साजन गुरुङ, विजय गुरुङ, मनिलाल गुरुङ र शिव गुरुङलगायत पनि पार्टी परित्याग गरी नेकपामा प्रवेश गरेका छन् । साविककाे ताङ्लीचोकका दीपक सुनार, सुमिन गुरुङ, सागर गुरुङलगायत नेता–कार्यकर्ताले पनि पार्टी परित्याग गरेका छन् ।
पूर्वनयाँशक्तिबाट नेकपामा प्रवेश गरेकाहरूलाई नेकपाका केन्द्रीय सदस्य कृष्ण धितालले स्वागत गरेका थिए ।
फरकधारमा प्रकाशित कुनै समाचारमा तपाईंको गुनासो भए हामीलाई [email protected] मा इमेल गर्न सक्नुहुनेछ । यही इमेलमा तपाईंले आफ्नो विचार वा विश्लेषण, सल्लाह र सुझाव पनि पठाउन सक्नुहुनेछ । हामीसँग तपाईं फेसबुक, ट्विटर, इन्स्टाग्राम, युट्युबमा पनि जोडिन सक्नुहुन्छ ।
