काठमाडौं– प्रधानमन्त्री केपी शर्मा ओलीले  मध्यपहाडी लोकमार्गमा अप्टिकल फाइबर बिछ्याउने योजनाको शुभारम्भ गरेका छन् । सोमबार धादिङको गल्छीमा साबेलले माटो फालेर अप्टिकल फाइबर बिछ्याउने योजनाको शुभारम्भ गरेका हुन् । 

योजनाअनुसार मध्यपहाडी लोकमार्गबाट जिल्ला सदरमुकामहरूलाई पनि सूचनाको राजमार्गमा जोडिनेछ । प्रदेश १, २ र ३ को मध्य पहाडी लोकमार्गमा अप्टिकल फाइबर तथा उच्च क्षमतायुक्त उपकरण बिस्तारका लागि काम अघि बढ्न लागेको हो ।

नेपाल टेलिकमले पाचँथरको चिवा भञ्ज्याङदेखि गोरखाको आरुघाटसम्म २ हजार १ सय ७९ किलोमिटर अप्टिकल फाइबर नेटवर्क विस्तार गर्न लागेको हो । टेलिकमको योजनाअनुसार मध्यपहाडी लोकमार्गको ८ सय ४ किलोमिटर  र राजमामार्गबाट विभिन्न स्थान लिंक गर्न १ हजार पाँच सय ७२ किलोमिटरमा अप्टिकल फाइबर बिछ्याइने भएको छ ।

यसअघि नेपाल दूरसञ्चार प्राधिकरण र नेपाल टेलिकमबीच २०७३ असोजमा अप्टिकल फाइबर बिच्छ्याउन सम्झौता भएको थियो । पाँचथरको चिवाभञ्ज्याङदेखि गोरखा र धादिङको सिमाना आरुघाटसम्म अप्टिकल फाइबर बिच्छ्याउनका लागि टेलिकम र प्राधिकरणबीच सम्झौता भएको थियो ।