काठमाडौं– राष्ट्रपति विद्यादेवी भण्डारीले राहदानीसम्बन्धी कानुनलाई संशोधन र एकीकरण गर्न बनेको विधेयक प्रतिनिधि सभामा फिर्ता पठाइदिएकी छिन् । संसदबाट पारित भएर सभामुखले प्रमाणीकरणका लागि पठाएको विधेयक राष्ट्रपतिले फिर्ता पठाएको यो पहिलोपटक हो । 

बुधबार राष्ट्रपति कार्यालयबाट जारी विज्ञप्तिअनुसार सभामुखले प्रमाणित गरी प्रमाणीकरणका लागि राष्ट्रपति भण्डारीसमक्ष पठाएको विधेयकलाई पुनर्विचारका लागि संसदमै पुनः फिर्ता पठाइएको हो । राष्ट्रपति कार्यालयले विधेयकमा पुनर्विचार गर्न आग्रह गरे पनि के–के कुरामा पुनर्विचार गर्ने हो भन्नेबारे खुलाएको छैन । 

राहदानीसम्बन्धी विधेयकमा मुद्दा चलेका व्यक्तिलाई नागरिकता नदिनेलगायत विषयमा राष्ट्रपति भण्डारी असन्तुष्ट रहेको बुझिएको छ । मुद्दा चलेको नाममा कुनै पनि नेपाली नागरिकलाई उसको अधिकारबाट वञ्चित गर्न नहुने भन्दै राष्ट्रपतिले विधेयक फिर्ता पठाएको बुझिएको छ ।