नयाँ दिल्ली– लोकसभा निर्वाचनमा भारी असफलतापछि कांग्रेस अध्यक्ष राहुल गान्धीले राजीनामा दिने प्रस्ताव गरे । तर, कांग्रेस कार्यकारिणी समितिले उनको प्रस्ताव स्विकारेन । 

निर्वाचन परिणमपछि आज बसेको कार्यकारिणी समिति बैठकमा राहुलले राजीनामाको प्रस्ताव राख्दा नेताहरुले ‘कांग्रेसलाई तपाईंको आवश्यकता छ’ भन्दै अस्वीकार गरेको भारतीय मिडियाहरुले जनाएका छन् । 

सन् २०१४ को निर्वाचनमा भोगेको नमीठो नतिजालाई उल्ट्याउने प्रयत्नमा यसपटक राहुल गान्धी दिलोज्यानले लागेका थिए । सके सरकार बनाउने, नसके पनि भाजपा नेतृत्वको सत्तारुढ गठबन्धन एनडिएलाई बहुमतबाट रोक्ने उनको योजना थियो । तर, परिणाम ठीक विपरीत भइदियो । भाजपाले २०१४ भन्दा पनि राम्रो प्रदर्शन गर्दै गठबन्धनको सहायता लिनै नपर्नेगरी एक्लै बहुमत ल्यायो ।

भाजपाले ३०३ सिट जित्दा राहुलको दल कांग्रेस ५२ सिटमा खुम्चियो । राहुल स्वयं गान्धी परिवारको खानदानी सिट अमेठीबाट पराजित भए । गान्धी परिवारको दशकौँको विरासतसमेत उनले जोगाउन सकेनन् । 

मतपरिणाम सार्वजनिक भएकै दिन (बिहीबार) राहुलले कांग्रेस अध्यक्षबाट राजीनामा गर्ने सोच बनाएको समाचार आएको थियो । आफ्नी आमा युपिए अध्यक्ष सोनिया गान्धीसामु उनले राजीनामाको प्रस्ताव गरेको भारतीय मिडियाहरुले बताएका थिए ।