इरानका परराष्ट्र मन्त्रालयका प्रवक्ता इस्माइल बघाइले सोमबार आयोजित नियमित पत्रकार सम्मेलनमा आफ्नो देशले ‘युरेनियम समृद्धिको अधिकारलाई अडिग र असमझौता योग्य विषय’ का रूपमा लिएको स्पष्ट गरेका छन् ।
उनले यो धारणा अमेरिकी विशेष दूत स्टिभ विटकोफको अभिव्यक्तिको सन्दर्भमा व्यक्त गरे, जसमा उनले इरानलाई युरेनियम समृद्धिमा प्रतिबन्ध लगाउने विषयमा आफ्नो देशको कडा नीति दोहोर्याएका थिए ।
प्रवक्ता बघाइले भने, ‘इरानले आफ्नो भूमिमा युरेनियम समृद्धिका लागि कसैको अनुमति लिनु पर्ने छैन । यो अधिकार अन्तर्राष्ट्रिय सन्धि, विशेषतः आणविक हतियार नफैलाउने सन्धी (एनपीटी) द्वारा स्पष्ट रूपमा सुनिश्चित गरिएको छ ।’
उनले युरेनियम समृद्धि गर्नु मात्रले कुनै राष्ट्रले अशान्तिपूर्ण उद्देश्य राखेको भन्ने ठहर गर्नु अनुचित र भ्रामक धारणा भएको पनि उल्लेख गरे । उनका अनुसार विश्वमा कैयौँ देशहरूले युरेनियम समृद्धि गरिरहे पनि उनीहरूसँग आणविक हतियार छैन ।
बघाईले पछिल्ला अप्रत्यक्ष वार्ताहरूमा केही सकारात्मक सङ्केत देखिएको जनाउँदै भने, ‘वार्ता सकिएपछि केही समझदारीको वातावरण बनेको महसुस हुन्छ, तर अमेरिकामा फर्किएपछि उहाँहरूको धारणा फेरिने देखिन्छ, जुन दुर्भाग्यपूर्ण हो ।’
फरकधारमा प्रकाशित कुनै समाचारमा तपाईंको गुनासो भए हामीलाई [email protected] मा इमेल गर्न सक्नुहुनेछ । यही इमेलमा तपाईंले आफ्नो विचार वा विश्लेषण, सल्लाह र सुझाव पनि पठाउन सक्नुहुनेछ । हामीसँग तपाईं फेसबुक, ट्विटर, इन्स्टाग्राम, युट्युबमा पनि जोडिन सक्नुहुन्छ ।
