इण्डियन प्रिमियर लिग (आइपिएल) सनराइजर्स हैदराबादले रोयल च्यालेन्जर्स बेंगलुरु (आरसिबी) लाई २ सय ३२ रनको लक्ष्य दिएको छ ।
लखनउस्थित भारत रत्न श्री अटल बिहारी वाजपेयी एकना क्रिकेट स्टेडियममा टस हारेर ब्याटिङको मौका पाएको हैदराबादले निर्धारित २० ओभरमा ६ विकेट गुमाएर २ सय ३१ रन बनायो ।
उसका लागि इशान किशनले उत्कृष्ट पारी खेले । उनले ४८ बलमा सात चौका र पाँच छक्कासहित अविजित ९४ रनको पारी खेलेका हुन् ।
यस्तै, अभिषेक शर्माले ३४, अनिकेत वर्माले २६, हेनरिक क्लासेनले २४, ट्रभिस हेडले १७, कप्तान प्याट कमिन्सले अविजित १३ तथा अभिनव मनोहरले १२ रन जोडे ।
आरसिबीका लागि रोमारियो शेफर्डले दुई तथा भुवनेश्वर कुमार, लुंगि एन्गिडी, सुयश शर्मा र कृणाल पाण्ड्याले एक/एक विकेट लिए ।
जारी सिजनमा बेंगलुरु उच्च लयमा छ । उसले १२ खेल खेल्दा आठमा जित, तीनमा हार तथा एक खेलमा अंक बाँडेको छ ।
आरसिबी १७ अंकसहित अहिले तालिकाको दोस्रो स्थानमा छ । उसले प्लेअफमा स्थान बनाइसकेको छ ।
गत सिजनको उपविजेता हैदराबाद भने प्लेअफ दौडबाट बाहिरिसकेको छ । उसले १२ म्याच खेल्दासम्म सातमा हार, चारमा जित र एक खेलमा अंक बाँडेको छ । हैदराबाद तालिकाको आठौँ स्थानमा छ ।
फरकधारमा प्रकाशित कुनै समाचारमा तपाईंको गुनासो भए हामीलाई [email protected] मा इमेल गर्न सक्नुहुनेछ । यही इमेलमा तपाईंले आफ्नो विचार वा विश्लेषण, सल्लाह र सुझाव पनि पठाउन सक्नुहुनेछ । हामीसँग तपाईं फेसबुक, ट्विटर, इन्स्टाग्राम, युट्युबमा पनि जोडिन सक्नुहुन्छ ।
