आइसिसी विश्वकप लिग–२ सिरिजको अभ्यासका लागि बेलायत भ्रमणमा रहेको नेपालले अपेक्षाअनुसार नतिजा निकाल्यो । त्यहाँका विभिन्न क्लबसँग खेलिएको पाँचवटै म्याचमा नेपालले जित दर्ता गरेको हो ।  

नेपालले कार्डिभ विश्व विद्यालयको न्यू पोर्ट क्लबलाई तीन विकेटले हराउँदै बेलायत भ्रमणको सुरुवात गरेको थियो । त्यस खेलमा नेपालको जितमा गुलशनकुमार झा र आरिफ शेखले उत्कृष्ट ब्याटिङ गरे ।

न्यू पोर्ट क्लबविरुद्धको एकदिवसीय अभ्यास खेलमा गुलशनले ८० तथा आरिफले ७२ रनको पारी खेले । त्यस खेलमा बलिङमा कुशल भुर्तेलले सर्वाधिक चार विकेट लिए । 

दोस्रो एकदिवसीय अभ्यास खेलमा नेपालको भेट मेरिलेबोन क्रिकेट क्लब (एमसिसी) सँग भयो । उक्त खेलमा नेपालले एमसिसीविरुद्ध १२३ रनको जित निकाल्यो । त्यस खेलमा दीपेन्द्र सिंह ऐरी र भीम सार्कीले शतकीय पारी खेले ।

तेस्रो र चौथो अभ्यास खेलमा नेपालले ग्लोसेस्टरशायर क्लबलाई क्रमशः ७३ रन र ५ विकेटले हरायो । चौथो अभ्यास खेलमा आसिफ शेखले ४२ बलमा ८४ रनको पारी खेल्दै लयमा फर्किएको संकेत देखाए । 

नेपालले बेलायत भ्रमणअन्तर्गत अन्तिम खेलमा सोमबार राति ग्लामोर्गन क्लबलाई ५० रनले हरायो । यस खेलमा भीम सार्कीले ९२ तथा कप्तान रोहितकुमार पौडेलले ६१ रनको इनिङ खेले ।

बलिङमा कुशल भुर्तेलले सर्वाधिक चार विकेट लिए । समग्रमा नेपाली टिमका लागि बेलायत भ्रमण सफल रह्यो । यद्यपि कमजोर क्लबसँग अभ्यास गराएको भन्दै समर्थकले क्यान र प्रशिक्षकको आलोचना गर्न बाँकी राखेनन् ।

यथार्थमा पनि नेपालविरुद्ध खेलेका क्लब कमजोर नै देखिए । नामका हिसाबले भने यी क्लब नयाँ होइनन् । यसपालि ती क्लबले नेपालविरुद्ध खेलाउँदा अधिकांश दोस्रो रोजाइका खेलाडीलाई प्राथमिकता दिए ।

प्रमुख खेलाडीहरू घरेलु प्रतियोगिता काउन्टी च्याम्पियनसिपमा व्यस्त भएका कारण इंग्लिस क्लबहरूले नेपालसँगको खेलमा दोस्रो रोजाइका प्लेयरलाई मैदान उतारेको हो । र, त्यसको फाइदा उठाउँदै नेपालले लगातार पाँच खेलमा जित निकाल्यो । 

टोली बेलायतबाटै स्कटल्याण्ड 

अब नेपाली टिमको असली परीक्षा स्कटल्याण्डमा हुनेछ । त्यहाँ नेपालले लिग–२ को महत्वपूर्ण श्रृंखला खेल्नेछ । सिरिजमा नेपालको प्रतिद्वन्द्वी हुने छन्, एसोसियटतर्फका सर्वाधिक बलियो टोली स्कटल्याण्ड र नेदरल्याण्ड्स । सिरिजमा नेपालले २ र ८ जुनमा स्कटल्याण्ड तथा ४ र १० जुनमा नेदरल्याण्ड्सको सामना गर्नेछ । 

अंक तालिकामा अहिले नेदरल्याण्ड्स र स्कटल्याण्ड नेपालभन्दा माथि छन् । नेदरल्याण्ड्सले २० म्याच खेल्दासम्म १२ मा जित, ६ मा हार तथा दुई खेलमा अंक बाँडेको छ । ऊ २६ अंकसहित तालिकाको दोस्रो स्थानमा छ ।  

यस्तै, चौथो स्थानमा रहेको स्कटल्याण्डले १६ खेल खेल्दा ९ मा जित, पाँचमा हार तथा दुई खेलमा अंक बाँडेको छ । तालिकाको आठौँ स्थानमा रहेको नेपालले १२ म्याच खेल्दा आठमा हार, दुईमा जित र दुई खेलमा वर्षाका कारण अंक बाँडेको छ । २४ म्याच खेल्न बाँकी रहेको नेपालसँग अहिले ६ अंक मात्र छ । 

नेपाली टोली अहिले संवेदनशील मोडमा पुगेको छ- जहाँ जितको संख्या मात्र होइन, आत्मविश्वास, लय र योजनाबद्ध रणनीति पनि टोलीलाई आवश्यक छ । बेलायतमा लगातार पाँच जित हासिल गरेपछि टोलीको मनोबल त बलियो भएको छ । तर, मुख्य चुनौती अझै बाँकी छ । अबको स्कटल्याण्ड भ्रमणले नेपाल लिग–२ मा माथि उठ्ने कि झन् पछि पर्ने भन्ने तय गर्नेछ ।