काठमाडौँ– नेपाल कम्युनिस्ट पार्टी (नेकपा) का अध्यक्ष पुष्पकमल दाहाल ‘प्रचण्ड’ ले घर छाडेर गएका आफ्ना सन्तान बेलुकी टुप्लुक्क घर आइपुग्दा अभिभावकलाई खुसी लाग्ने बताएका छन् । विप्लव समूहका पोलिटब्यूरो सदस्य तथा पूर्वमन्त्री पदम राईलाई आइतबार पार्टी प्रवेश गराउने प्रसङ्गमा प्रचण्डले उक्त कुरा बताएका हुन् ।
प्रचण्डले भने, ‘अभिभावकलाई आफ्ना छोराछोरी या पात्रहरू रिसाएर, झगडा गरेर घर छोडेर गए भने दिनभरी उनीहरूकै चिन्ता लागिरहेको हुन्छ । के खायो होला, के लगायो होला, दुःख पायो होला । किनभने आफैंले हुर्काएको आफैंले पढाएको, आफैंले सम्हालेर यहाँसम्म ल्याँएको मान्छे, सधैं घरमा राखेर खुवाएको मान्छे गए पछि चिन्ता हुन्छ । बेलुका टुपुक्क आइपुगेपछि असाध्यै खुसी लाग्ने हुन्छ अभिभावकलाई । हाम्रो स्थिति त्यस्तै छ । पदम राई फेरि आएपछि हामी असाध्यै खुसी छौं ।
प्रचण्डले कुनै आग्रह पूर्वाग्रह नराखी मूल राजनीतिक प्रक्रियामा समाहित हुन नेपालका सबै कम्युनिस्टहरूलाई अपिल पनि गरेका छन् ।
उनले भने, ‘अरू कम्युनिस्ट समूह भनेर साथीहरूले जो चलाइरहनु भएको छ आउनुहोस् ! बसेर छलफल गरौं । संवाद गरौं । इतिहास, वर्तमान, राष्ट्रको, अन्तर्राष्ट्रिय परीस्थितिको समीक्षा गरौं । विश्लेषण गरौं । र, एउटा बलियो केन्द्र मार्फत् जनताका चाहना पूरा गरौं ।’
उनले समाजवादी आन्दोलनको नयाँ मोडेलको सन्देश विश्वलाई दिनुपर्ने बताए । प्रचण्डले नेपालमा एउटै बलियो कम्युनिस्ट पार्टी बनाउनुपर्ने बताउँदै त्यसको नेतृत्वमा ‘समृद्ध नेपाल सुखी नेपाली’ को सपना पूरा गराउनुपर्ने बताए ।
पार्टी प्रवेश कार्यक्रममा सचिवालय सदस्यहरू रामबहादुर थापा 'वादल' र विष्णु पौडेल पनि सहभागी थिए ।
फरकधारमा प्रकाशित कुनै समाचारमा तपाईंको गुनासो भए हामीलाई [email protected] मा इमेल गर्न सक्नुहुनेछ । यही इमेलमा तपाईंले आफ्नो विचार वा विश्लेषण, सल्लाह र सुझाव पनि पठाउन सक्नुहुनेछ । हामीसँग तपाईं फेसबुक, ट्विटर, इन्स्टाग्राम, युट्युबमा पनि जोडिन सक्नुहुन्छ ।