काठमाडौं महानगरपालिकाले कालीमाटी प्रहरी बिट अगाडिको करखुसी खोला किनारमा बनेका अवैध संरचना हटाउने प्रक्रिया सुरु गरेको छ ।
आइतबार दिउँसो टोजरसहित पुगेको महानगरको टोली केही संरचना भत्काउन सुरु गरेको हो । वडा नम्बर १४ का वडा सदस्य अच्युत सापकोटाले डुबानबाट बच्नका लागि तयारीस्वरूप स्थानीयबासीको सहकार्यमा संरचना भत्काउन सुरु गरिएको जानकारी दिए ।
‘बर्षायाम सुरु भएकाले खोलामा बाढी आउने र डुबान हुने भएकाले स्थानीयबासीसँगैको सहकार्यमा तत्कालका लागि केही पुलहरू हटाउन सुरु गरेका हौं,’ उनले भने ।
दुई हप्ताअघि आएको पानीले समस्या आएका कारण स्थानीयसँगको सोधपुछ एवं सल्लाहअनुसार पुल हटाइएको उनले जानकारी दिए । ‘अहिले तत्काललाई चार/पाँचवटा पुल हटाउने तयारी छ । खोला गहिराउनेभन्दा पनि सफा गर्ने अभियान छ । वाल लगाएर सुरक्षाको विधि अपनाउने तयारीमा छौँ,’ सापकोटाले भने ।
स्थानीय शिवकुमार थापाले पुल हटाउँदा डुबान केही हदसम्म कम हुन्छ भन्ने आशा गरेको बताए । पूर्णरूपले डुबान हुँदैन भन्ने स्थिति नरहे पनि प्रकृति विरुद्धमा जान नसकिने भएकाले संरचनाको व्यवस्थापन गर्न जरुरी रहेको उनले बताए ।
‘करिब २५ बर्षदेखि यस क्षेत्र बस्दै आए पनि बर्सेनि डुबानको समस्या झेलिरहेका छौँ । निजी पुलका कारण स्थानीयबासी पीडित छन् । व्यक्तिगतरूपमा निर्माण भएका पुल यस वडामा दुईवटा छन्, १४ नम्बर वडामा करिब पाँचवटा होलान्,’ थापाले भने ।
फरकधारमा प्रकाशित कुनै समाचारमा तपाईंको गुनासो भए हामीलाई [email protected] मा इमेल गर्न सक्नुहुनेछ । यही इमेलमा तपाईंले आफ्नो विचार वा विश्लेषण, सल्लाह र सुझाव पनि पठाउन सक्नुहुनेछ । हामीसँग तपाईं फेसबुक, ट्विटर, इन्स्टाग्राम, युट्युबमा पनि जोडिन सक्नुहुन्छ ।
