नेपाली टिम फेरि एकपटक एसिसी यू–१६ इस्ट जोन कप क्रिकेट प्रतियोगिताको उपाधितर्फ अग्रसर भइरहेको छ । मलेसियामा जारी यस प्रतियोगिताको समूह चरणको खेल सकिँदा नेपालले उपाधि जित्ने संकेत देखाएको हो । 

नेपालले सतप्रतिशत जितका साथ सेमिफाइनलमा स्थान सुरक्षित गरिसकेको छ । समूह ‘ए’ अन्तर्गतको आफ्नो अन्तिम खेलमा मंगलबार भुटानलाई २ सय ९८ रनको विशाल अन्तरले हराउँदै नेपाल लगातार चार खेलमा जित निकाल्दै समूह विजेताको हैसियतमा सेमिफाइनल पुगेको हो । 

समूह चरणमा नेपालको प्रदर्शन 

समूह चरणमा नेपालले एकतर्फी प्रदर्शन गर्‍यो । सुरुवातमा सिंगापुरलाई ६ विकेटले हराएको नेपालले त्यसपछि जापानलाई ९ विकेटले पाखा लगायो । 

इन्डोनेसियाविरुद्ध ३ सय ७० रनको ऐतिहासिक जित निकाल्दै नेपालले प्रतियोगितामा आफ्नो दबदबा कायम राख्यो । अन्तिम खेलमा भुटानलाई २ सय ९८ रनले हराउँदै नेपाल समूह ‘ए’ मा चारै खेल जित्ने एक मात्र टोली बन्यो । 

यो प्रदर्शन हेर्दा नेपालले यसपालि पनि सहजै उपाधि जित्ने संकेत देखाएको छ । 

उच्च लयमा तीन खेलाडी

नेपालको सफलता पछाडि केही खेलाडीको व्यक्तिगत प्रदर्शन अत्यन्तै उल्लेखनीय रह्यो । ब्याटिङमा सबैभन्दा अगाडि छन्, मध्यक्रमका ब्याटर रौनक श्रीवास्तव । 

उनले चार खेलमा एक शतक र एक अर्धशतकको मद्दतमा सर्वाधिक २ सय ९६ रन बनाएका छन् । रौनकले मंगलबारको खेलमा भुटानविरुद्ध १३२ बलमा १६ चौका र ५ छक्कासहित १६८ रनको ऐतिहासिक पारी खेले । जुन प्रतियोगिताको सबैभन्दा उच्च व्यक्तिगत स्कोर हो ।

यसअघिको सबैभन्दा उच्च व्यक्तिगत स्कोर अर्जुन कुमालको नाममा थियो । उनले सन् २०२३ मा एसिसी यू–१९ प्रिमियर कपमा साउदी अरेबियाविरुद्ध १४३ रनको पारी खेलेका थिए ।

रौनकसँगै ओपनर प्रसिद्ध जैसीले पनि जारी प्रतियोगितामा उत्कृष्ट प्रदर्शन गरिरहेका छन् । उनले चार खेलमा एक शतक र एक अर्धशतकसहित २ सय २७ रन बनाएका छन् । 

यस प्रतियोगितामा प्रसिद्धको उच्च स्कोर १३२ रन हो । यी दुई ब्याटरको निरन्तर योगदानले नेपालको टप अर्डर र मध्यक्रम दुवै मजबुत देखिएको छ । बलिङतर्फ कप्तान विपिनप्रसाद शर्माले सशक्त प्रभाव छाडिरहेका छन् । 

उनले चार खेलमा १.९४ को सानदार इकोनमी रेटमा सर्वाधिक १५ विकेट लिएका छन् । विपिनले दुई खेलमा चार/चार र एक खेलमा ५ विकेट लिँदै विपक्षी टिमको ब्याटिङ धराशायी बनाइरहेका छन् । उनको बलिङले सुरुआती ब्रेक थ्रु मात्र होइन, खेलको लय नै नेपालको पक्षमा फर्काइदिएको छ ।

रौनक, प्रसिद्ध र विपिनको उत्कृष्ट प्रदर्शनले नेपाललाई सेमिफाइनलसम्म सहज यात्रा गराएको छ । अब उनीहरू निर्णायक खेलमा पनि यही लयलाई कायम राख्ने योजनामा छन् । 

चौथोपटक उपाधि जित्ने मौका

नेपालले यसअघि लगातार तीनपटक एसिसी यू–१६ इस्ट जोन कपको उपाधि जितिसकेको छ । पछिल्लोपटक सन् २०२३ मा नेपालले मलेसियालाई हराउँदै तेस्रोपटक उपाधि जितेको थियो । यसपालिको संस्करणमा पनि नेपाल उपाधि दाबेदार टिमको अग्रपङ्क्तिमा छ । 

टोलीको समग्र प्रदर्शन, ब्याटिङ र बलिङको गहिरो सन्तुलन, खेलाडीबीचको समझदारी र रणनीतिक स्पष्टताले नेपाललाई उपाधितर्फ बलियो रूपमा उभ्याएको छ । 

अब नेपालले बिहीबार सेमिफाइनलमा आयोजक मलेसियासँग प्रतिस्पर्धा गर्नेछ । घरेलु मैदानमा खेल्ने भएकाले मलेसियाका लागि यो खेल जित्ने राम्रो अवसर छ ।

ऊ दर्शकको साथ, परिचित पिच र वातावरणको फाइदा उठाउने प्रयासमा हुनेछ । तर, यता अपराजित रहँदै सेमिफाइनल पुगेको नेपाली टोली मलेसियाको उपाधि सपना फेरि एकपटक तोड्ने योजनामा छ । 

नेपालको लक्ष्य सेमिफाइनलमा सशक्त जित निकाल्दै फाइनलको टिकट पक्का गर्नु र लगातार चौथोपटक उपाधि जित्ने सम्भावनालाई अझ मजबुत बनाउनु हो । जारी प्रतियोगिताको अर्को सेमिफाइनलमा हङकङ र सिंगापुर आमनेसामने हुने छन् ।