काठमाडौंमा ‘स्टडी इन इन्डिया एक्सपो’ पुनः आयोजना हुँदै छ । यही शुक्रबार र शनिबार अर्थात् साउन २३ र २४ गते (८–९ अगस्ट २०२५) नेपालको सबैभन्दा पुरानो र भरपर्दो भारतीय शिक्षा मेलाको रूपमा चिनिने स्टडी इन इन्डिया एक्सपो पुनः आयोजना हुन लागेको हो । 

अफेयर्स नेपाल प्रा. लि. को आयोजनामा द एभरेष्ट होटलमा हुने यो एक्सपोले भारतका प्रमुख विश्वविद्यालय र कलेजहरूलाई एउटै छानामुनि ल्याउनेछ । आयोजकका अनुसार यो एक्सपोबाट नेपाली विद्यार्थीहरूलाई भारतमा उच्च शिक्षा सम्बन्धी सही जानकारी र मार्गदर्शन प्रदान पाउनेछन् । 

यो एक्सपोमा विज्ञान, व्यवस्थापन र मानविकी धारका विद्यार्थीहरूका लागि स्नातक, स्नातकोत्तर, व्यावसायिक तथा व्यावसायिक पाठ्यक्रमहरू समेटिने अफेयर्स नेपाल प्रा. लि. संस्थापक एवं प्रबन्ध निर्देशक कुमार थपलियाले बताए । सहभागी शैक्षिक संस्थाहरूको प्रतिनिधित्व प्रत्यक्ष वा तिनका आधिकारिक नेपाली कन्सल्ट्यान्टहरूमार्फत गरिनेछ।

दुई दिनसम्म चल्ने यो एक्सपोले विद्यार्थी र अभिभावकहरूलाई मैत्रीपूर्ण र जानकारीमूलक वातावरणमा विश्वविद्यालयका प्रतिनिधिहरूसँग प्रत्यक्ष भेटघाट गर्ने अनुपम अवसर प्रदान गर्ने आयोजकको विश्वास छ । विद्यार्थीहरूले पाठ्यक्रम छनोट, भर्ना योग्यता, शुल्क, छात्रवृत्ति, भविष्यको करियर, छात्रावास, पूर्वाधार र अन्य सुविधाहरूबारे जानकारी लिन पाउने थपलियाले बताए । 

पाँच हजारभन्दा बढी आगन्तुकहरूले यस एक्सपोलाई लाभ उठाउने अपेक्षा आयोजकले गरेको छ । थपलियाका अनुसार इन्जिनियरिङ, पेरामेडिकल, नर्सिङ, डेन्टल, आइटी, एआई र एमएल, डिजाइन, व्यवस्थापन, होटेल म्यानेजमेन्ट, पत्रकारिता, आर्किटेक्चर लगायतका विषयहरूमा मेरिट आधारमा स्पट एडमिशन र छात्रवृत्ति पनि उपलब्ध हुनेछ ।

‘विद्यार्थीहरूले आफ्ना रुचि र क्षमताअनुसार भविष्यमा रोजगारीको सम्भावना हुने क्षेत्रको सही छनोट गर्नुपर्छ । यही सन्देश ’स्टडी इन इन्डिया एक्सपो मार्फत दिइनेछ,’ थपलियाले भने । 

भारत नेपाली विद्यार्थीहरूका लागि सांस्कृतिक निकटता, विश्व स्तरीय शिक्षा, लागतको पहुँच योग्यता र विषयवस्तुको विविधताका कारण अत्यन्तै लोकप्रिय गन्तव्य बन्न पुगेको छ । भारतमा अध्ययन गर्नु भनेको केबल डिग्री मात्र नभई समृद्ध सांस्कृतिक अनुभव र उज्वल भविष्यका लागि अवसर पनि मानिन्छ ।