गाजामा बढ्दो स्वास्थ्य संकटले मानव जीवनको जोखिम उचालिरहेको छ । विश्व स्वास्थ्य संगठनले इजरायललाई गाजाको स्वास्थ्य स्थिति ‘विपत्तिपूर्ण’ भनी चेतावनी दिएको छ भने गाजा सिटीमा कब्जा गर्ने इजरायली सेनाको योजना अन्तर्राष्ट्रिय समुदायमा गम्भीर चिन्ता निम्त्याएको छ । यसले त्यहाँका आम नागरिकका लागि आवश्यक स्वास्थ्य सेवा अभावमा पर्न सक्ने खतरा उजागर गरेको छ ।

डब्लुएचओका फिलिस्तीनी क्षेत्र प्रतिनिधि रिक पीपरकोर्नले बताएअनुसार गाजामा औषधिको भण्डारण आधा मात्र छ र स्वास्थ्य सेवाका संरचना आधाभन्दा कम मात्र सञ्चालनमा छन् । अस्पताल अत्यधिक भीड भएका कारण शैय्या क्षमताभन्दा तीन गुणासम्म बढी बिरामी राख्न बाध्य छन्, जसले उपचारको गुणस्तर र उपलब्धतालाई गम्भीररूपमा प्रभावित बनाएको छ ।

यस्तो परिस्थितिमा कुपोषण र भोकमरीले स्वास्थ्य संकट झन् विकराल बन्दै गएको छ । गत महिना मात्र पाँच वर्षमुनिका करिब १२ हजार बालबालिकामा तीव्र कुपोषण देखिएको तथ्यांकले मानविय संकटको आयाम स्पष्ट पारेको छ । तीमध्ये दुई हजारभन्दा बढी बालबालिका गम्भीर कुपोषणको सिकार भएका छन्, जसले तत्काल उपचार आवश्यक रहेको देखाउँछ ।

विश्व स्वास्थ्य संगठनले आवश्यक सामग्रीको आपूर्ति सुनिश्चित गर्न कडा प्रयास गरिरहेको भएता पनि इजरायली पक्षले सहयोग सामग्री गाजा भित्र पसेको सीमित मात्रामा मात्रै अनुमति दिएको छ । यसले स्वास्थ्य सेवाको प्रभावकारी सञ्चालनमा बाधा पु¥याइरहेको छ र सम्भावित आक्रमण अघि अस्पतालहरूलाई आवश्यक सामग्री पु¥याउन अझ कठिन बनाएको छ ।

गाजामा युद्ध, राजनीतिक द्वन्द्व र नाकाबन्दीले उत्पन्न संकट स्वास्थ्य क्षेत्रमा केन्द्रित मानवीय आपतकालीन अवस्थाको रूपमा देखिन थालेको छ । यहाँका मानिसहरू आधारभूत स्वास्थ्य सेवा र जीवनरक्षाका साधनविना बाँच्छन् भने भविष्य अझ अन्धकारमय छ ।

यो अवस्था अन्तर्राष्ट्रिय मानवअधिकार र चिकित्सा सहायता संगठनहरूको ध्यानाकर्षणको विषय बन्ने आवश्यक छ । विश्वले गाजामा चलिरहेको स्वास्थ्य संकटलाई बेवास्ता गर्दा मानव जीवन र अधिकारको गम्भीर उल्लङ्घन हुने जोखिम बढ्दो छ ।

इजरायल र अन्तर्राष्ट्रिय समुदायबीच तिव्र र समन्वित प्रयासविना गाजामा शान्ति, स्थायित्व र स्वास्थ्य सेवाको पहुँच सम्भव नहुने देखिन्छ । यसले मानवीय संकटको गहिराइलाई मात्रै बढाउनेछ, जसबाट प्रभावित हुने सबैभन्दा बढी आम नागरिक, विशेषगरी बालबालिका र महिलाहरू हुनेछन् ।

गाजाको स्वास्थ्य प्रणाली अहिले नाजुक अवस्थामा छ । यसलाई बचाउन तत्काल प्रभावकारी मानवीय सहायता र दीर्घकालीन पुनर्निर्माण आवश्यक छ । राजनीतिक विवाद र युद्धले मानवीय अधिकार र स्वास्थ्य सेवा पहुँचलाई कहिल्यै अधीनस्थ बनाउनु हुँदैन भन्ने कुरा विश्वले गहिरो सोच राख्न जरुरी छ ।