एक अमेरिकी संघीय न्यायाधीशले डोनाल्ड ट्रम्प प्रशासन र फ्लोरिडा राज्य सरकारलाई ‘एलिगेटर अल्काट्राज’ भनिने विवादास्पद आप्रवासी हिरासत केन्द्र तत्काल बन्द गर्न आदेश दिएका छन् । 

जिल्ला न्यायाधीश क्याथलिन विलियम्सले बिहीबार दिएको आदेशअनुसार उक्त केन्द्रमा अब नयाँ आप्रवासी ल्याउन पाइने छैन । साथै, फ्लोरिडाको एभरग्लेड्स सिमसार क्षेत्रमा आठ दिनमै हतारमा निर्माण गरिएको यो अस्थायी संरचनाका तारबार, बत्ती, जेनेरेटर तथा फोहोर व्यवस्थापन प्रणाली ६० दिनभित्र हटाउनुपर्नेछ । फ्लोरिडा सरकारले भने तत्कालै यस निर्णयविरुद्ध अपिल गर्ने घोषणा गरेको छ ।

एभरग्लेड्समा परित्यक्त एयरफिल्डमा बनाइएको यो केन्द्रमा बङ्क बेड, तारको पिँजडा र ठूला सेतो पालहरू प्रयोग गरिएको थियो । गृहमन्त्री क्रिस्टी नोएमका अनुसार यहाँ करिब तीन हजार आप्रवासीलाई राख्ने योजना थियो । गत महिना भ्रमणका क्रममा तत्कालीन राष्ट्रपति ट्रम्पले कठोर अवस्थाको घमन्ड गर्दै यसलाई ‘एलिगेटर अल्काट्राज’ नाम दिएका थिए ।  

सान फ्रान्सिस्को खाडीस्थित चर्चित टापु जेल ‘अल्काट्राज’ को सन्दर्भमा राखिएको यो नामप्रति उनले गर्व प्रकट गरेका थिए । वातावरणविद् र आप्रवासन अधिकारकर्मीहरूले शुरु देखिनै यस केन्द्रलाई अमानवीय भन्दै विरोध गर्दै आएका थिए ।

 ‘फ्रेन्ड्स अफ द एभरग्लेड्स’ र ‘सेन्टर फर बायोलोजिकल डाइभर्सिटी’ नामक समूहहरूले दायर गरेको मुद्दामा न्यायाधीशले निर्णय सुनाएका हुन् । यी समूहहरूले आवश्यक वातावरणीय प्रभाव मूल्याङ्कन नगरी संवेदनशील पारिस्थितिकी क्षेत्रमा हतारमा बनाइएको आरोप लगाएका थिए ।

भित्रै रहेका धेरै आप्रवासीले स्वास्थ्य उपचारको कमी, दुर्व्यवहार र कानुनी अधिकार उल्लङ्घनबारे गुनासो गरेका छन् । २५ वर्षीय क्युबाली आप्रवासी लुइस गोन्जालेजले एएफपीसँग फोनमा भने, ‘तिनीहरूले जनावरहरूमाथि पनि यस्तो व्यवहार गर्दैनन् । यो यातना जस्तै हो ।’ उनले करिब ३० जनासँग एउटै कोठा बाँड्नुपरेको बताए, जसलाई उनले ‘कुखुराको घर’ सँग तुलना गरे । 

ट्रम्प प्रशासनले यसलाई ‘देशभरका अन्य हिरासत सुविधाका लागि आदर्श नमुना’ बनाउन चाहेको भए पनि अदालतको आदेशपछि ‘एलिगेटर अल्काट्राज’ प्रभावकारी रूपमा बन्द हुने भएको छ ।