अमेरिकी राष्ट्रपति डोनाल्ड ट्रम्पले युक्रेनमा युद्धविरामको पहलस्वरूप रुसी राष्ट्रपति भ्लादिमिर पुटिनलाई दुई साताभित्र वार्तामा बस्न अल्टिमेटम दिएका छन् ।
शुक्रबार अमेरिकी टेलिभिजन सिएनएनसँगको अन्तर्वार्तामा उनले पुटिनलाई दुई साताभित्र युक्रेनी राष्ट्रपति भ्लादिमिर जेलेन्स्कीसँग वार्ताको टेबलमा बस्नुपर्ने चेतावनी दिए ।
‘दुई हप्तापछि पनि वार्ता भएन भने म ठोस निर्णय गर्छु,’ ट्रम्पले भने । गत हप्ता मात्रै अलास्कामा पुटिनसँग भेट गरेका ट्रम्पले त्यसपछि ह्वाइट हाउसमा जेलेन्स्की र युरोपेली नेताहरूसँग छलफल गरेका थिए ।
उनले युद्धविरामभन्दा स्थायी शान्ति उत्तम हुने भन्दै पहिलो चरणमा पुटिन-जेलेन्स्कीबीच द्विपक्षीय वार्ता र त्यसपछि आफूसमेत सहभागी हुने त्रिपक्षीय वार्ताको प्रस्ताव अघि सारेका छन् । तर, रुसी विदेशमन्त्री सेर्गेई लावरोभले पुटिन र जेलेन्स्कीबीच नजिकैमा कुनै भेटवार्ता हुने योजना नरहेको बताएका छन्, जसले वार्ता प्रक्रिया फेरि अनिश्चित हुने संकेत गरेको छ ।
अलास्कामा भएको भेटपछि ट्रम्पले पुटिनसँग पुनः चाँडै भेट हुन सक्ने बताएका थिए । पुटिनले भने अर्को भेट मस्कोमा हुने संकेत दिएका थिए ।
शुक्रबार ओभल अफिसमा पत्रकारसँग कुरा गर्दै ट्रम्पले भने, ‘दुई हप्तापछि कुन दिशामा जाने भनेर म निर्णय गर्छु । दुईमध्ये एउटाको पक्षमा जान्छु । त्यसपछि उनीहरूले बुझ्नेछन् ।’
उनले पुटिनसँग अलास्कामा खिचिएका तस्बिरहरू देखाउँदै पुटिनले आफूलाई सम्मानजनक व्यवहार गरेको दाबी पनि गरे । साथै, पुटिन आगामी विश्वकपका लागि अमेरिकामा सहभागी हुने/नहुने निर्णय पनि यही दुई साताभित्रको राजनीतिक घटनाक्रममा निर्भर रहने ट्रम्पले उल्लेख गरे ।
फरकधारमा प्रकाशित कुनै समाचारमा तपाईंको गुनासो भए हामीलाई [email protected] मा इमेल गर्न सक्नुहुनेछ । यही इमेलमा तपाईंले आफ्नो विचार वा विश्लेषण, सल्लाह र सुझाव पनि पठाउन सक्नुहुनेछ । हामीसँग तपाईं फेसबुक, ट्विटर, इन्स्टाग्राम, युट्युबमा पनि जोडिन सक्नुहुन्छ ।
