काठमाडौं– भारतीय गायिका नेहा कक्कडको सांगीतिक कार्यक्रममा भएको विवाद सम्बन्धमा प्रहरीले ३ जनालाई पक्राउ गरेको छ । गएराति ठमेलस्थित एलओडी क्लबमा भएको कार्यक्रममा आयोजक पारामाउन्ट इन्टरटेन्मेन्ट प्रालिले क्लबको क्षमताभन्दा बढी टिकट बिक्री गरेपछि विवाद उत्पन्न भएको हो । 

आयोजकले टिकटमा बदमासी गरिदिँदा नेहाको प्रस्तुति हेर्न गएका सयौँ दर्शक क्लबबाहिरै बस्नुपरेको थियो । आक्रोशित दर्शकले आफूहरु ठगीमा परेको भन्दै प्रहरी गुहारेका थिए । टिकट काटेर दर्शक अलपत्र पारेको पुष्टि भएपछि काठमाडौं प्रहरी परिसर टेकुको टोलीले आयोजक संस्थाका दीपक घिमिरे, रविन श्रेष्ठ र अर्का एकजनालाई पक्राउ गरेको छ ।

प्रहरीका अनुसार, पीडितहरुले टिकटको रकम फिर्ता पाउनुपर्ने माग गरेका छन् । प्रहरीले टिकट रकम फिर्ता गराउने पहलस्वरुप छलफल गरिरहेको छ । छलफलबाट निकाश ननिस्किए पक्राउ परेका आयोजकमाथि मुलुकी अपराध संहिताको ठगी कसुरअन्तर्गत कारबाही चलाउने प्रहरीको तयारी छ ।