इन्टर मियामीका डिफेन्डर जोर्डी अल्बाले यस सिजनको मेजर लिग सकर (एमएलएस) प्लेअफ सकिएपछि व्यावसायिक फुटबलबाट सन्न्यास लिने घोषणा गरेका छन् ।
यससँगै लिओनल मेसीका पूर्वसहकर्मीमध्ये यो वर्ष खेलबाट विदा लिने उनी दोस्रो खेलाडी बनेका छन् ।
३६ वर्षका अल्बाले मंगलबार सामाजिक सञ्जालमार्फत आफ्नो निर्णय सार्वजनिक गर्दै भनेका छन्, ‘अब मेरो जीवनको एक अर्थपूर्ण अध्याय समाप्त गर्ने समय आएको छ । यो सिजनको अन्त्यसँगै मैले व्यवसायिक फुटबलबाट विदा लिने निर्णय गरेको छु। यो निर्णय मैले पूर्ण विश्वास र शान्तिका साथ गरेको हुँ ।’
गत शनिबार इन्टर मियामीले सर्जियो बुस्केट्सलाई बिदाइ गरेको तीन दिनपछि अल्बाले पनि सन्न्यास घोषणा गरेका हुन् । उनको मियामीसँगको सम्झौता सन् २०२७ सम्मको भए पनि उनले समयअघि नै खेल जीवन टुंग्याउने निर्णय गरेका हुन् ।
मेसीले सन् २०२३ को जुन महिनामा इन्टर मियामीमा जाने घोषणा गरेलगत्तै अल्बा पनि त्यहाँ पुगेका थिए । बार्सिलोनामा रहँदा उनले क्लबलाई ६ ला लिगा, ५ कोपा डेल रे र सन् २०१५ मा युरोपियन च्याम्पियन्स लिग जिताउन महत्वपूर्ण भूमिका निभाएका थिए ।
फरकधारमा प्रकाशित कुनै समाचारमा तपाईंको गुनासो भए हामीलाई [email protected] मा इमेल गर्न सक्नुहुनेछ । यही इमेलमा तपाईंले आफ्नो विचार वा विश्लेषण, सल्लाह र सुझाव पनि पठाउन सक्नुहुनेछ । हामीसँग तपाईं फेसबुक, ट्विटर, इन्स्टाग्राम, युट्युबमा पनि जोडिन सक्नुहुन्छ ।
