ओमानमा जारी आइसिसी टी–२० विश्वकप छनोटअन्तर्गत कुवेतविरुद्ध बलिङमा नेपालले सन्तोषजनक प्रदर्शन गरेको छ ।
नेपालले दिएको १ सय ४२ रनको लक्ष्य पछ्याइरहेको कुवेतले १० ओभरमा महत्वपूर्ण चार विकेट गुमाएर ५६ रन बनाएको छ ।
कुवेतले रविजा सन्दारुवान, उस्मान पटेललाई शून्य, मीत भावसारलाई ११ तथा क्लिन्टो एन्टोलाई २६ रनमा गुमायो । नेपाललाई पहिलो सफलता सोमपाल कामी, दोस्रो ललितनारायण राजवंशी र तेस्रो सफलता नन्दन यादवले दिलाएका हुन् । यस्तै, दीपेन्द्र सिंह ऐरीले रनआउटमार्फत नेपाललाई विकेट दिलाए ।
त्यसअघि अल अमेरात क्रिकेट मैदानमा टस हारेर ब्याटिङको निम्तो पाएको नेपालले निर्धारित २० ओभरमा ७ विकेट गुमाएर १ सय ४१ रन बनायो । नेपालका लागि ओपनिङ ब्याटर कुशल भुर्तेलले अर्धशतकीय पारी खेले । उनले ५६ बलमा तीन छक्का र तीन चौकासहित ६६ रनको पारी खेलेका हुन् । टी–२० आईमा कुशलको यो १२औँ अर्धशतक हो ।
यस्तै, अलराउन्डर गुलशन झाले आक्रामक ब्याटिङ गरे । उनले ६ बलमा लगातार तीन छक्कासहित २० रन बनाए । यस्तै, उपकप्तान दीपेन्द्र सिंह ऐरीले २०, कप्तान रोहितकुमार पौडेलले १६ रन जोडे । बाँकी ब्याटरले भने दोहोरो अंकमा समेत रन बनाउन सकेनन् । कुवेतका लागि नवीनराज राजेन्द्रन र अनुदीप चेन्थमाराले सर्वाधिक दुई/दुई विकेट लिए ।
जारी प्रतियोगितामा नेपाल र कुवेत पहिलो म्याच खेलिरहेका हुन् । हालसम्म नेपाल र कुवेतबीच टी–२० अन्तर्राष्ट्रिय क्रिकेटमा यसअघि तीनपटक सामना भएको छ, जसमा नेपालले दुई खेल जितेको र कुवेतले एक खेल आफ्नो पक्षमा पारेको छ ।
जारी विश्वकप छनोटमा आजै भएको पहिलो खेलमा आयोजक ओमानले सामोआलाई पराजित गरेको थियो । यस्तै, दोस्रो खेलमा यूएईले कतारविरुद्ध ७ विकेटको सहज जित निकाल्यो ।
फरकधारमा प्रकाशित कुनै समाचारमा तपाईंको गुनासो भए हामीलाई [email protected] मा इमेल गर्न सक्नुहुनेछ । यही इमेलमा तपाईंले आफ्नो विचार वा विश्लेषण, सल्लाह र सुझाव पनि पठाउन सक्नुहुनेछ । हामीसँग तपाईं फेसबुक, ट्विटर, इन्स्टाग्राम, युट्युबमा पनि जोडिन सक्नुहुन्छ ।
