एएफसी एसियन कप छनोटको तेस्रो चरणमा सुरुवाती दुई खेलमा अंकविहीन नेपालले आज भियतनामविरुद्ध पहिलो अंक जोड्ने लक्ष्य राखेको छ ।
मुख्य प्रशिक्षक म्याट रसले भियतनामविरुद्ध ३ अंककै लागि खेल्ने महत्वाकांक्षा व्यक्त गरेका छन् । ‘हामी यहाँ आउन पाउँदा उत्साहित छौँ। तीन अंकका लागि खेल्नेछौँ, नभए कम्तीमा एक अंकका लागि प्रयास गर्नेछौँ,’ रसले बुधबारको प्रि–म्याच कन्फरेन्समा भने ।
उनका अनुसार लाओसविरुद्धको निराशाजनक प्रदर्शन सुधार्ने योजना टोलीले बनाएको छ। ‘यी प्रतियोगिताहरू खेलाडीहरूका लागि सपना देख्ने मञ्च हुन् । आगामी दुई खेल टोलीको क्षमताको परीक्षा हुनेछन्,’ उनले थपे ।
कप्तान किरण चेम्जोङले पनि भियतनामविरुद्ध सकारात्मक नतिजाको आशा व्यक्त गरे । ‘भियतनामसँग खेल्न पाउँदा उत्साहित छु । उनीहरूको आक्रमण बलियो छ । तर, हामी उत्कृष्ट प्रदर्शन गर्नेछौँ,’ उनले भने ।
नेपाल २२ वर्षपछि भियतनामसँग प्रतिस्पर्धामा उत्रँदैछ । यसअघि सन् २००३ को एसियन कप छनोटमा दुवै खेलमा नेपाल पराजित भएको थियो । फिफा वरियतामा भियतनाम ११४औँ र नेपाल १७६औँ स्थानमा छन् ।
नेपाल यसअघि मलेसिया र लाओससँग हार्दै समूहमा अन्तिम स्थानमा छ । भियतनामले लाओसलाई हराउँदै मलेसियासँग हार बेहोरेको छ ।
नेपाल र भियतनामबीचको खेल आज साँझ ६:१५ बजे हुनेछ ।
फरकधारमा प्रकाशित कुनै समाचारमा तपाईंको गुनासो भए हामीलाई [email protected] मा इमेल गर्न सक्नुहुनेछ । यही इमेलमा तपाईंले आफ्नो विचार वा विश्लेषण, सल्लाह र सुझाव पनि पठाउन सक्नुहुनेछ । हामीसँग तपाईं फेसबुक, ट्विटर, इन्स्टाग्राम, युट्युबमा पनि जोडिन सक्नुहुन्छ ।
