ओमानमा जारी आइसिसी टी–२० विश्वकप छनोटअन्तर्गत सुपर सिक्स चरणमा कतारविरुद्ध नेपाललाई दोस्रो सफलता पनि लेग स्पिनर सन्दीप लामिछानेले दिलाएका छन् ।
उनले १२ ओभरको अन्तिम बलमा मुहम्मद-असिम लियाकत-अलीलाई १० रनमा एल्बीडब्लू आउट गरे ।
कतारको पहिलो विकेट पनि सन्दीपले नै लिए । उनले १० ओभरको अन्तिम बलमा इमाल लियानागेलाई ५६ रनमा बोल्ड गरे । इमालले ३४ बलमा पाँच चौका र तीन छक्कासहित ५६ रनको पारी खेले ।
१ सय ४८ रनको लक्ष्य पछ्याइरहेको कतारले १० ओभरमा एक विकेट गुमाएर ७९ रन बनाएको छ । त्यसअघि टस हारेर ब्याटिङको मौका पाएको नेपालले निर्धारित २० ओभरमा ९ विकेट गुमाएर १ सय ४७ रन बनायो । कतारविरुद्ध नेपालका लागि कप्तान रोहितकुमार पौडेलले महत्वपूर्ण अर्धशतकीय पारी खेले ।
उनले ४१ बलमा सात चौका र एक छक्काको सहयोगमा ५८ रनको पारी खेलेका हुन् । टी–२० आईमा रोहितको यो आठौँ अर्धशतकीय इनिङ हो । यस्तै, दीपेन्द्रले २६, गुलशनकुमार झाले १६, सोमपाल कामीले १४ र आसिफ शेख ११ रन जोडे ।
बाँकी ब्याटरले भने दोहोरो अंकमा समेत रन बनाउन सकेनन् । कतारका लागि कप्तान मिर्जा मोहम्मद बेग र डेनियल आर्चर मारिया लुइसले सर्वाधिक तीन–तीन विकेट लिए ।
फरकधारमा प्रकाशित कुनै समाचारमा तपाईंको गुनासो भए हामीलाई [email protected] मा इमेल गर्न सक्नुहुनेछ । यही इमेलमा तपाईंले आफ्नो विचार वा विश्लेषण, सल्लाह र सुझाव पनि पठाउन सक्नुहुनेछ । हामीसँग तपाईं फेसबुक, ट्विटर, इन्स्टाग्राम, युट्युबमा पनि जोडिन सक्नुहुन्छ ।
