काठमाडौं– गृहमन्त्री रामबहादुर थापा ‘बादल’ले राजावादी र विखण्डनवादीका गतिविधि निगरानीमा राख्न निर्देशन दिएका छन् । प्रदेश प्रहरी प्रमुखको खटिन लागेका सात डिआइजीलाई मंगलबार निर्देशन दिँदै उनले जनतालाई प्रभावकारी सेवा प्रवाह हुने गरी काम गर्न भनेका छन् ।
 
आफूलाई कर्मचारी मात्र नठानी  जिम्मेवार नागरिक पनि हुँ भन्ने गरी काम गर्न निर्देशन दिँदै उनले भने, ‘प्रदेशअनुसार फरक–फरक समस्या र विशिष्टता छन् । सोहीअनुसार रणनीति बनाएर काम गर्नुपर्ने अवस्था छ ।’ 
 
कतिपय ठाउँमा प्रहरी र तस्करको मिलेमतोको खबर आउने गरेकाले त्यसमा सचेत हुन आग्रह गर्दै उनले तस्करीका नयाँ रुट खुलेको सुनिएको बताए ।  

उनले राजावादी र विखण्डनवादिका गतिविधि निगरानीमा राख्न र विप्लव समूहका गतिविधि नियन्त्रणलाई प्राथमिकतामा राख्न निर्देशन दिएको गृह मन्त्रालयले जनाएको छ । 
 
गृह मन्त्रालयले गत शुक्रबार सातै प्रदेशका प्रहरी प्रमुख हेरफेर गरेको थियो ।