राष्ट्रिय सडक सञ्जालमा जोडिएर १४ वर्ष बितिसक्दा पनि मुगु जिल्लाका सडकहरू अझै कालोपत्रे हुन सकेका छैनन् । कच्ची र साँघुरो सडकका कारण यात्रु र सवारी चालकहरूले कठिनाइ भोग्दै आइरहेका छन् ।
१ पुस २०६९ सालमा तत्कालीन प्रधानमन्त्री डा.बाबुराम भट्टराईद्वारा उद्घाटन गरिएको नाग्म–गमगढी सडकको मुगु जिल्ला क्षेत्रमा अहिलेसम्म पनि कालोपत्रे गरिएको छैन ।
सरकारले २०७२ सालभित्र जिल्ला जोड्ने सडक कालोपत्रे गर्ने लक्ष्य राखे पनि हिलाम्ये वर्षा र धुलाम्ये हिउँद, सडकको किनारमा नाला, घुम्ती, वाल र सुरक्षासम्बन्धी कुनै सुविधा नहुँदा काम अपूर्ण रहेको छ ।
विगत १५ वर्षदेखि सवारी साधनहरू चलाइरहेका स्थानीय चालक सुशील बुढाले भने कच्ची सडककै कारण धेरै सास्ती भोग्नुपरेको बताउँछन् । रोजीरोटीका लागि बाध्य भएर उनी र अन्य चालकहरूले नाग्म–गमगढी सडक खण्डमा जोखिम मोलेर साना र ठूला सवारी साधनहरू चलाइरहेका छन् ।
कालीकोट–नाग्म–गमगढी सडक ९४ किलोमिटर भए पनि जुम्ला–हाडसिंन्जा ७ किलोमिटर बाहेक बाँकी सडक कालोपत्रे हुन सकेको छैन । ताल्चा विमानस्थल–गमगढी ९ किलोमिटर, गमगढी–तारापानी–सोरुकाट ४१ किलोमिटर, गमगढी–छाइल १८ किलोमिटर र गमगढी–बालैपिना–खत्याड–कालाकाँडा–जुम्ला ३५ किलोमिटर सडक पनि नाजुक अवस्थामा छ ।
छायानाथ यातायात प्रा.लि.का सचिव सन्तोष शाही भने सडकको कमजोर मापदण्डका कारण गाडीका पाटा, टायरलगायतका उपकरण बिग्रने र वर्षेनी सडक दुर्घटनाले मानवीय तथा धनजनको ठूलो क्षति हुने बताउँछन् ।
संघीय र प्रदेश सरकारबीच जिम्मेवारीको विभाजनका कारण मुगुमा सडक विकास ढिला भएको हो । तर, यस वर्ष ताल्चा–गमगढी सडक कालोपत्रे तथा मर्मत सुधारका लागि बजेट व्यवस्था गरिएको मुगुका प्रदेशसभा सदस्य जित बहादुर मल्लले जानकारी दिए ।
मुगुका सडकको जोखिमपूर्ण अवस्थाले स्थानीय बासिन्दा मात्र होइन, रारा ताल जस्ता पर्यटकीय स्थल घुम्न आउने पर्यटकहरूलाई पनि सास्तीमा पारिरहेको छ । सडक सञ्जालमा जोडिएको लामो समय बितिसक्दा पनि सडकको दयनीय अवस्थाले तीन तहका सरकारलाई गिज्याइरहेको छ ।
फरकधारमा प्रकाशित कुनै समाचारमा तपाईंको गुनासो भए हामीलाई [email protected] मा इमेल गर्न सक्नुहुनेछ । यही इमेलमा तपाईंले आफ्नो विचार वा विश्लेषण, सल्लाह र सुझाव पनि पठाउन सक्नुहुनेछ । हामीसँग तपाईं फेसबुक, ट्विटर, इन्स्टाग्राम, युट्युबमा पनि जोडिन सक्नुहुन्छ ।
