न्यूजिल्याण्डका स्टार अलराउण्डर जिमी निशम यस वर्षको नेपाल प्रिमियर लिग (एनपिएल) मा पोखरा एभेन्जर्सको जर्सीमा देखिने भएका छन् ।
१ मंसिरदेखि सुरु हुने दोस्रो सिजनका लागि पोखराले शुक्रबार बिहान उनलाई विदेशी कोटाबाट अनुबन्ध गरेको घोषणा गरेको हो ।
पहिलो सिजन जनकपुर बोल्ट्सका लागि खेल्दै उपाधि जिताउन महत्वपूर्ण योगदान दिएमा निशम यसपटक भने नयाँ फ्रेन्चाइजमार्फत् लिगमा सहभागी हुन लागेका हुन् ।
जनकपुरलाई च्याम्पियन बनाउन उनले बल र ब्याट दुवैमा उत्कृष्ट योगदान दिएका थिए । ३५ वर्षीय निशम यस सिजनको एनपिएलमा समावेश हुने न्यूजिल्याण्डका तेस्रो खेलाडी बनेका छन् ।
यसअघि विराटनगर किंग्सले मार्टिन गप्टिल र सुदूरपश्चिम रोयल्सले स्कट कुग्लाइनलाई अनुबन्ध गरिसकेका छन् ।
निशमले हालै सार्वजनिक भिडियोमार्फत प्राविधिक कारण यस सिजन जनकपुरबाट नखेल्ने जानकारी गराएका थिए । टेस्ट खेलाडी भित्र्याउने मामलामा ड्र हुँदा पोखराले चिट्ठा जितेका कारण जनकपुरले निशमलाई भित्र्याउन नसकेको हो ।
उनले अन्तर्राष्ट्रिय क्रिकेटमा १२ टेस्ट, ७६ एकदिवसीय र ९३ टी–२० आई खेलेका छन् । टी–२० आईमा निशमले १४९.६२ को स्ट्राइक रेटमा १ हजार १० रन बनाएका छन् ।
बलिङतर्फ यो ढाँचामा उनले ५६ विकेट लिएका छन् । निशमले आइपिएलसहित विश्वका दर्जनौं फ्रेन्चाइज लिगको अनुभव हासिल गरिसकेका छन् । समग्र टी–२० करियरमा उनले ३१९ खेलमा ४ हजार ४९६ रन र २६९ विकेट लिएका छन् ।
सन् २०१९ को वानडे विश्वकप र २०२१ को टी–२० विश्वकपमा न्यूजिल्याण्ड उपविजेता बन्दा निसम टिमका महत्वपूर्ण सदस्य थिए । उनको आगमनसँगै पोखराको टोली थप सशक्त भएको छ ।
ब्याटिङ र बलिङ दुवैतर्फ निसमले स्थिरता र शक्ति थप्ने पोखराको विश्वास छ ।
कुशल भुर्तेललाई मार्की प्लेयर बनाएको पोखराले यसअघि वेस्ट इण्डिजका अलराउण्डर रेमन रेफर, इंग्ल्याण्डका डान डाथवेइट र इंग्ल्याण्डकै विकेटकिपर/ब्याटर एडम रोसिङ्गटनलाई अनुबन्ध गरिसकेको छ ।
फरकधारमा प्रकाशित कुनै समाचारमा तपाईंको गुनासो भए हामीलाई [email protected] मा इमेल गर्न सक्नुहुनेछ । यही इमेलमा तपाईंले आफ्नो विचार वा विश्लेषण, सल्लाह र सुझाव पनि पठाउन सक्नुहुनेछ । हामीसँग तपाईं फेसबुक, ट्विटर, इन्स्टाग्राम, युट्युबमा पनि जोडिन सक्नुहुन्छ ।
