मधेस प्रदेशको मुख्यमन्त्रीमा सरोज कुमार यादवको नियुक्ति असंवैधानिक रहेको भन्दै विरोध जनाउँदै आएको मधेस प्रदेशका सात राजनीतिक दलहरूले आइतबार राष्ट्रिय झण्डासहित प्रदर्शन गरिरहेका छन् । जनकपुरधामस्थित मधेस भवन अगाडि सडकमै बसेर सात राजनीतिक दलका सांसद, नेता तथा कार्यकर्ताहरू विहानैदेखि शान्तिपूर्ण प्रदर्शन गरिरहेका हुन् ।  

जसपा नेपाल, लोसपा, नेकपा माओवादी केन्द्र, नेकपा एस, नागरिक उन्मुक्ति पार्टी, नेपाली कांग्रेस र जनमत पार्टीका सांसद र नेता एवम् कार्यकर्ताहरू मुख्यमन्त्री यादव र सभामुख रामचन्द्र मण्डलविरुद्ध नारा लगाउँदै विरोध प्रदर्शन गरिरहेका छन् ।

अदालतको फैसला आउने भएकाले आफूहरू आशावादी रहेको र अदालतमाथि पूर्ण विश्वास रहेको भन्दै राष्ट्रिय झण्डासहित सडकमा आएको लोसपाका सांसद परमेश्वर साहले बताए  । उनले अदालतले न्यायपूर्ण फैसला गर्नेमा आफूहरू विश्वस्त रहेको बताए ।

यदी सरोज कुमार यादवलाई नै मुख्यमन्त्री ठहर गरेमा प्रदेश सभामा विश्वासको मत दिने बेला उनको फैसला हुने सांसद साहले बताए । मधेस प्रदेशका पूर्व प्रदेश प्रमुख सुमित्रा सुवेदी भण्डारीले यादवलाई मुख्यमन्त्रीमा नियुक्त गर्दै महोत्तरीको एक होटलमा शपथ खुवाएका थिए । 

त्यसको विरोध गर्दै सात राजनीतिक दलहरूले निरन्तर विरोध गर्दै आएका छन् भने अदालतमा रिट समेत जारी गरेका थिए । सर्वोच्च अदालतले आजका लागि पेसी तोकेको छ भने सम्पूर्ण कागजातसहित दुवै पक्षलाई छलफलका लागि बोलाएको थियो । 

मुख्यमन्त्रीमा यादवको नियुक्ति र शपथविरुद्धको रिटमाथि सर्वोच्च अदालतमा आइतबार हुने भनिएको सुनुवाइ भने स्थगित भएको छ । आइतबार हुने भनिएको सुनुवाइ सोमबारसम्मका लागि सरेको हो ।

मधेसमा १ सय ७ जना सांसद छन् । सरकार बनाउन ५४ सांसद सङ्ख्या बहुमत हो । एमालेका सभामुखसहित २५, कांग्रेस २२, जसपा १९, जनमत १३, माओवादी ९, लोसपा ९, नेकपा (एस) ७, संघीय समाजवादी, राप्रपा र नागरिक उन्मुक्ति पार्टीका १–१ जना सांसद छन् । यसमध्ये एमाले, जसपा र लोसपाका १/१ सांसद निलम्बित छन् । मधेस प्रदेशसभामा हाल कायम रहेको सदस्य सङ्ख्या १ सय ४ हो । जसकारण मुख्यमन्त्री बन्नका लागि ५४ जना प्रदेश सभा सदस्यको समर्थन  आवश्यक पर्दछ ।