झापा– स्थानीयले थापेको विद्युतीय धरापमा परी झापामा अहिलेसम्म ११ वटा हात्ती मरेका छन् । शुक्रबार राति जिल्लाको हल्दीबारी गाउँपालिकामा पर्ने रणकाली सामुदायिक वननजिकै एउटा हात्ती मरेको छ । यसअघि झापामा विद्युतीय धरापमा परी १० वटा हात्ती मरेका थिए ।

स्थानीयले रातको समयमा तारको घेराबारा राखी विद्युतीय करेन्ट फैलाएका थिए । शुक्रबार जंगलबाट गाँउ पस्न खोजेको करिब अढाइ वर्ष उमेरको हात्ती विद्युतीय धरापमा परेर मरेको सब डिभिजन वन कार्यालय जलथलले जनाएको छ । 

जलथलको चारकोसे जंगलआसपास क्षेत्रमा भने यस्तो घटना पहिलो हो । मेचीनगर नगरपालिकाको उत्तरी क्षेत्रमा भने यस्तो घटना दसौँपटकसम्म भएको जिल्ला वन कार्यालय झापाले जनाएको छ ।

नौ वर्षयता झापामा धरापमा परेर ११ वटा हात्ती मरेको जिल्ला वन कार्यालय झापाले जनाएको छ । हात्तीले बस्ती, किसानका धनसम्पत्ति, अन्नबाली नास गर्ने गरेको र त्यसबाट जोगिन स्थानीयले धराप थापेका हुन् । 

आहाराका लागि गाउँ पसेका हात्तीको आक्रमणबाट अहिलेसम्म ३९ जना सर्वसाधारणको मृत्यु भइसकेको जिल्ला वन कार्यालयको तथ्यांक छ । 

भेटनरी चिकित्सकबाट शुक्रबार मरेको हात्तीको पोस्टमार्टम गराएर अन्येष्टि गरिने सब डिभिजन वन कार्यालयको भनाइ छ ।