काठमाडौं– भूमि व्यवस्था, सहकारी तथा गरिबी निवारण मन्त्री पद्मा अर्यालले आफ्नो मन्त्रालय मातहतका सबै निकायमा सुशासन कायम गराउन लागिपरेको दाबी गर्दै घुस खाने कर्मचारीलाई आफ्नो मन्त्रालय र विभागबाट कुनै संरक्षण नहुने वाचा गरेकी छिन् । 

आज काठमाडौंको साँखुमा आधुनिक सुविधायुक्त मालपोत कार्यालय सेवाको शुभारम्भ गर्दै मन्त्री अर्यालले मन्त्री अर्यालले आफ्नो मन्त्रालय र विभागबाट घुस खाने कर्मचारीलाई कुनै संरक्षण गरेको प्रमाण दिए आफू फाँसीमा झुन्डिन तयार रहेकोसमेत बताइन् । 

सेवाग्राहीले काम छिटो गर्ने नाममा कर्मचारीलाई घुस्याहा बनाएकाले सुशासन कायम गर्न आफूलाई अप्ठयारो परिरहेको गुनासो गरेकी मन्त्री अर्यालले कर्मचारीलाई घुस नदिने संकल्प गर्न सेवाग्राहीलाई अपिल गरिन् । कसैले पनि घुस नदिए, नलिए कार्यालयमा आफैँ सुशासन कायम हुने उनले सुझाइन् । 

मालपोत तथा नापी कार्यालयमा सबैभन्दा बढी विकृति भित्रिएकाले त्यसलाई अन्त्य गर्न सरकारले प्रविधिमा जोड दिएको उनले प्रस्ट्याइन् ।