नयाँ दिल्ली– विधानसभा निर्वाचन नजिकिँदै गर्दा दिल्लीका मुख्यमन्त्री अरविन्द केजरीवालले दिल्लीवासीका लागि लोभलाग्दा योजनाहरु सार्वजनिक गरेका छन् ।

बिहीबार मुख्यमन्त्री केजरीवालले दिल्लीमा २०० युनिटसम्म बिजुलीको बिल माफ गर्ने घोषणा गरे । २०१ देखि ४०० युनिटसम्मको बिलमा पनि ५० प्रतिशत अनुदान दिने उनले घोषणा गरे । अबदेखि दिल्लीमा अन्य राज्यको तुलनामा सबैभन्दा सस्तो बिजुली उपलब्ध हुने मुख्यमन्त्री केजरीवालले बताए ।

दिल्लीमा ६ महिनाभित्र विधानसभा निर्वाचन हुँदै छ । 

यसअघि, केजरीवालले दिल्लीमा महिलाहरुका लागि मेट्रो रेल, डिटिसी र क्लस्टर बसमा निःशुल्क यात्राको घोषणा गरेका थिए । यसका लागि दिल्लीमा १२ महिनाभित्र ३ हजार सिसी क्यामरा सहितका बस भित्र्याउने र यसमा खर्च हुने ७ देखि ८ अर्ब भारतीय रुपैयाँ दिल्ली सरकारले नै व्यहोर्ने उनले बताएका थिए ।

चार सालअघिको विधानसभा निर्वाचनमा केजरीवालको आम आदमी पार्टीले ७० मध्ये ६७ सिट जितेको थियो । ३ सिट भाजपाको पक्षमा गएको थियो । सत्ता सम्हालेयता भने उनको जनमत खस्कँदै गएको भारतीय मिडियाहरुको विश्लेषण छ ।

दुई महिनाअघि सम्पन्न लोकसभा निर्वाचनले पनि यस्तै देखाउँछ । यो निर्वाचनमा दिल्लीका सातै सिट भाजपाले जित्यो । उनको पार्टीले एक सिट पनि हात पार्न सकेन । यद्यपि, लोकसभा (केन्द्रीय) निर्वाचनको परिणाम हेरेर विधानसभा (प्रादेशिक) निर्वाचनमा पनि त्यस्तै नतिजा होला भन्न भने सकिन्न । 

निर्वाचनका लागि ६ महिनाभन्दा कम समय बाँकी रहँदा मुख्यमन्त्री केजरीवालले नयाँ–नयाँ लोभलाग्दा योजना ल्याउनुलाई गुम्दै गएको ‘चार्म’ फर्काउने उनको रणनीतिका रुपमा हेरिएको छ ।