काठमाडौं– सरकारले तीनै तहको उपनिर्वाचन आगामी मंसिरमा गर्ने निर्णय गरेको छ । 

मन्त्रिपरिषद् बैठकका निर्णय सुनाउँदै सरकारका प्रवक्ता तथा सञ्चार तथा सूचना प्रविधिमन्त्री गोकुल बाँस्कोटाले आगामी मंसिर १४ गतेका लागि तीनै तहको उपनिर्वाचनको मिति तय गरिएको जानकारी गराए ।

यसअघि निर्वाचन आयोगले सिफारिस गरेकै मितिमा सरकारले उपनिर्वाचनको मिति तोकेको हो । कानुनअनुसार निर्वाचनको मिति निर्वाचन आयोगको सिफारिसमा सरकारले तोक्ने व्यवस्था छ । 

निर्वाचन आयोगले तीनवटै तहमा रिक्त रहेका कुल ५० स्थानमा मंसिर १४ गते एकैदिन निर्वाचन गराउन सुझाव दिएको थियो ।

देशभर रिक्त रहेका  प्रतिनिधिसभा सदस्य–१, प्रदेशसभा सदस्य–३, नगरपालिका प्रमुख– १, गाउँपालिका अध्यक्ष–३, गाउँपालिका उपाध्यक्ष–१ र वडाध्यक्ष–४१ पदमा निर्वाचन हुने भएको हो ।