नयाँ दिल्ली– भारतीय पूर्व वित्त मन्त्री अरुण जेटलीको स्वास्थ्य अवस्था नाजुक भएको भारतीय मिडियाहरुले जनाएका छन् । श्वासप्रश्वासमा कठिनाइ भएपछि जेटली १० दिनअघि दिल्लीस्थित एम्स अस्पताल भर्ना भएका थिए । उनलाई ‘लाइफ सपोर्ट सिस्टम’मा राखिएको छ । 

अवस्था नाजुक बन्दै गएपछि नेताहरु उनलाई भेट्न अस्पताल जाने क्रम बाक्लिएको छ । गएको दुई दिनमा राष्ट्रपति रामनाथ कोविन्द, गृहमन्त्री अमित शाह, उत्तर प्रदेशका मुख्यमन्त्री योगी आदित्यनाथ, बसपा नेत्री मायावती लगायतले उनलाई भेटेका छन् । भाजपा वरिष्ठ नेता लालकृष्ण आडवाणीले पनि आज एम्स पुगेर जेटलीलाई भेटेका छन् । 

६६ वर्षे भाजपाका पाका नेता जेटली सफ्ट टिस्यु क्यान्सरसँग लडिरहेका छन् । एक वर्षअघि एम्समै उनको मिर्गौला प्रत्यारोपण पनि गरिएको थियो । 

संसदीय निर्वाचनमा हारका बाबजुद अघिल्लोपटकको मोदी सरकारमा वित्तमन्त्री भएका मोदीका विश्वास पात्र जेटलीले स्वास्थ्यकै कारण यसपटक मन्त्री बन्न अनिच्छा देखाएका थिए । उनले यसपटकको चुनाव पनि लडेका थिएनन् ।