काठमाडाैं– आफ्नै श्रीमतीलाई बलात्कार गरेको अभियोगमा प्रहरीले भक्तपुरबाट एकजनालाई पक्राउ गरेको छ ।

पक्राउ परेका व्यक्तिकी श्रीमतीले महानगरीय प्रहरी परिसर भक्तपुरमा आफू बिरामी हुँदा पनि श्रीमानले बलात्कार गरेको जाहेरी दिएपछि प्रहरीले उनका श्रीमान् मोहन (नाम परिवर्तन)लाई बिहीबार पक्राउ गरेको हो ।
 
रामेछाप घर भई हाल चाँगुनारायण नगरपालिका–८ जितपुर बस्दै आएका ३० वर्षीय श्रीमान्ले २६ वर्षीया श्रीमतीलाई बलात्कार गरेको जाहेरी आएपछि श्रीमान्लाई पक्राउ गरिएको प्रहरी परिसर भक्तपुरका प्रहरी नायब उपरीक्षक रेवतीरमण पोखरेलले जानकारी दिए ।
 
१० वर्षअघि विवाह भएको यो दम्पतीको आठ वर्षको एक छोरा रहेको उनले जानकारी दिए । प्रहरीले थापाथलीस्थित प्रसूतिगृहमा श्रीमतीको स्वास्थ्य परीक्षण गरिएको र श्रीमान्को शुक्रबार स्वास्थ्य परीक्षण गरी अदालत पेस गर्ने र थप अनुसन्धान गर्ने जानकारी दिएकाे छ ।