भरतपुर– चितवन जिल्ला अदालतले आज पनि पत्रकार रवि लामिछानेलाई प्रहरी हिरासतमा पठाएको छ । पत्रकार शालिकराम पुडासैनीको आत्महत्या प्रकरणमा दुरुत्साहनको आरोपमा रविसहित अन्य दुईलाई १० दिनअघि प्रहरीले पक्राउ गरेको थियो ।

आइतबारबाट तीनैजनाको बयान अदालतमा सुरु भएको छ । तर, आइतबार अस्मिता भनिने रुकु कार्कीको मात्र बयान सकियो ।

अदालतले अब युवराज कँडेल र रवि लामिछानेको बयान सोमबार विहानबाट सुरु गर्ने जनाएको छ ।

अर्केतिर रवि लामिछानेलाई अनाहकमा फसाउन खोजिएको चितवन जिल्ला अदालतअगाडि समेत प्रदर्शन गरिएको छ । प्रहरीले यो क्षेत्रलाई केही अघि निषेधित क्षेत्र घोषणा गरेको थियो ।