भरतपुर– पत्रकार शालिकराम पुडासैनी आत्महत्या प्रकरणमा पक्राउ परेका टिभी कार्यक्रम प्रस्तोता रवि लामिछानेले पाँच लाख धरौटीमा रिहा भएको भोलिपल्ट मंगलबार पत्रकार सम्मेलन गरेका छन् । 

भरतपुरमा आयोजित पत्रकार सम्मेलनमा उपस्थित अधिकांशले रविलाई राजनीतिमा आउन सुझाव दिएका थिए । 

कार्यक्रममा केहीले भने, ‘राजनीतिमा आउने मात्र होइन, रवि दाइ प्रधानमन्त्री बन्नुपर्छ ।’

यो जिज्ञासाको जवाफमा रविले भने, ‘मैले जानेको कुरा होइन, राजनीति म आउँदिनँ ।’ तर, उनी यतिमा नै रोकिएनन् । बरु राजनीतिमा आउने संकेत गर्दै उनले भने, ‘यसको अर्थ सबै सम्भावना अन्त्य भएको हो भन्ने पनि होइन ।’

रविले देशमा नेताहरु इमान्दार भइदिए उनी र उनीजस्ता अरु केही व्यक्ति राजनीतिमा आउनै नपर्ने तर्क पनि गरे । उनले भने, ‘राजनीतिज्ञले आफूले निर्वाचन जितेर आएको स्थानबारे सोच्नु पर्यो, इमान्दार व्यक्ति भइदिए पुग्छ ।’ उनले नेताहरु इमान्दार नभएकाले र आफ्नो काम नसोचिरहेकाले आफूहरुले प्रश्न गर्न परेको पनि बताए ।

अब अझ जिम्मेवार भएर अगाडि बढ्ने बताउँदै रविले भने, ‘हामीले प्रश्न सोध्न छोड्नुहुँदैन ।’