Thu, 21 Nov, 2019


पाकिस्तानी मन्त्रीको आरोप– १० श्रीलंकाली खेलाडीलाई भारतले धम्काएर पाकिस्तान नजाने बनायो
फरकधार / भदौ २४, २०७६

नयाँ दिल्ली– पाकिस्तानी विज्ञान मन्त्री चौधरी फवाद हुसेनले पाकिस्तान भ्रमणबाट नाम फिर्ता लिएका १० श्रीलंकाली खेलाडीलाई भारतले धम्काएको आरोप लगाएका छन् ।



यसअघि लसिथ मालिंगा, एन्जेलो म्याथ्युजलगायत १० खेलाडीेले सुरक्षाको कारण देखाउँदै २७ सेप्टेम्बरदेखि ९ अक्टोबरसम्मका लागि निर्धारित पाकिस्तान भ्रमणमा जाने टोलीबाट आफ्नो नाम फिर्ता लिएका थिए । भ्रमणका क्रममा श्रीलंकाले पाकिस्तानसँग ३ एकदिवसीय र ३ टी–२० को सिरिज खेल्ने कार्यक्रम छ । 

ती १० खेलाडीलाई भारतले पाकिस्तान गए आइपिएलबाट निकालिदिने धम्की दिएकाले उनीहरुले भ्रमण रद्द गर्नुपरेको पाकिस्तानी मन्त्रीले आरोप लगाएका हुन् । आजको एक ट्विटमा मन्त्री फवादले खेल कमेन्टेटरहरुले आफूलाई यस्तो बताएको उल्लेख गरेका छन् । 

उसो त, पाकिस्तानमा श्रीलंकाली टोलीमाथि आक्रमण भइसकेको छ । सन् २००९ मा ३ टेस्ट र ३ एकदिवसीयको सिरिज खेल्न पाकिस्तान गएको श्रीलंकाली टोली चढेको बस सिरिजकै बीच लाहोरमा आतंकवादी हमलामा परेको थियो । हमलामा ८ सर्वसाधारण मारिएका थिए भने श्रीलंकाली टोलीका ७ सदस्य घाइते भएका थिए । 


यो सामाग्री सेयर गर्नुहोस्


यो पनि नछुटाउनुहोस्