काठमाडौं– श्रम तथा रोजगार कार्यालय विराटनगरमा आएको दुई महिना पनि नबित्दै आफ्नो सरुवा भएपछि त्यसको विरोधमा नेपाल सरकारका उपसचिव प्रेम सन्जेलले पत्रकार सम्मेलन गरे । 

यो केही समयअघिको कुरा हो । पत्रकार सम्मेलनमा सन्जेल निकै कड्किए । त्यसपछि उनी सामाजिक सन्जाल तथा युट्युबरहरुको आँखामा पर्न थाले । अनेक विषयमा आफ्ना मत राख्न थाले । 

कडा शब्द, रुखो बोल्ने शैलीका कारण प्रेमलाई सुन्नेहरु धेरै भए । 

अद्यापि अहिले पनि प्रेम सन्जेल चर्चामा नै छन् । त्यसैले उनलाई फलो गर्नेहरु पनि बढिरहेका छन् । 

केही दिनयता तिनै प्रेम सन्जेलको एउटा भिडियो सामाजिक सन्जालमा भाइरल भइरहेको छ । 

विराटनगरमा रहेको सन्जेलको श्रम तथा रोजगार कार्यालयमा उनले गरिरहेको एउटा कामको भिडियो युवा मन नेपाल नामको युट्युबमा राखिएको छ । यही भिडियोबाट विभिन्न क्लिप अहिले फेसबुक तथा ट्विटरमा भाइरल भइरहेको छ । 

तर, भिडियोमा प्रेम सन्जेलले जे बोलेका छन्, त्यो हाम्रो समाजमा सुहाउँदा छैनन् । कतिसम्म भने उनले केही युवाहरुलाई कमजोर संकेत गर्दै भनेका छन्– जुँगा भएका महिलाहरु । 

एकजना कसैले पैसा लिएको र फिर्ता नगरिदिएको उजुरी लिएर पाँच जना युवाहरु सन्जेलको अफिसमा कुराकानी गर्न पुगेका रहेछन् । उनले ती ठगिएका ती युवाहरुलाई पैसा लिएर भागेका ती व्यक्तिसँग सम्पर्क गराउँछन् । ठगिएका युवाहरु धन्यवाद भन्दै बाहिर निस्कन्छन् । त्यति बेला प्रेम सन्जेल भन्छन्– जुँगा भएका महिलाहरु । 

त्यसपछि उनले नेपाली समाजमा अपाच्य केही शब्दहरु बोलेका छन् । 

महिलालाई के यति कमजोर देख्छन् प्रेम सन्जेल ? 

भिडियोमा लगत्तै त्यहाँ नै एक महिला देखिन्छन् । 

यी सब कुरा भुलेर अहिले सामाजिक सन्जालमा चाहिँ काम गर्ने मान्छे भनेको प्रमे सन्जेलजस्तो हुनुपर्छ भन्ने टिकाटिप्पणी भइरहेको छ ।

हामीले यो भिडियोबारे प्रष्ट हुन यो भिडियो युट्युबमा अपलोड गरेका युवा मन नेपालका किशोर श्रेष्ठलाई सम्पर्क गर्यौँ । 

‘हामी आफैं गएर खिचेको भिडियो हो त्यो,’ उनले भने, ‘प्रेम सर चाहिँ मिडियामा आउन खासै खोज्नुहुँदैन । उहाँको अफिसमा हामी पुगेका हौँ ।’

अपशब्द र महिलालाई होच्याउने शब्दमात्र होइन, प्रेम सन्जेलले आफ्नो कार्यालयमा आएका सेवाग्राहीहरुलाई पनि निकै रुखो पारामा थर्काएको भिडियोमा देख्न÷सुन्न सकिन्छ ।

एउटा सरकारी कर्मचारीले सेवा लिन आएका आम जनतामाथि गर्ने व्यवहार यस्तै हो त ? 

‘यो खासमा मनोरोग हो,’ एक मनोविद्ले भने, ‘केही व्यक्तिहरुलाई उनीहरुको कार्य प्रशंसा गर्दै गइदिँदा आफ्नो सतह र स्थान बिर्सिन्छन् अनि जे मन लाग्छ त्यही गर्न थाल्छन् ।’

तर, प्रेमको बोली र भाषा त्यतिमा मात्र सिमित छैन । यही भिडियोका विभिन्न क्लिप विभिन्न सामाजिक प्लेटफर्ममा सेयर गर्दै मानिसहरु प्रेम सन्जेलको वाहवाही गरिरहेका छन् । 

महिलालाई होच्याउनु, कार्यालयमा बसेर जथाभावी शब्द बोल्नु के हामीलाई पाच्य हुन थालेको हो ? कि सरकारका उपसचिवले जे मन लाग्छ त्यही बाेल्दा हुन्छ, त्याे पनि आफ्नै कार्यालयमा ?

हेर्नुहोस्, अहिले चर्चामा रहेको र प्रेम सन्जेलले मनपरी बोलेको यो भिडियोः