Thu, 12 Dec, 2019


अमेरिकाले फेरि भन्यो– साउदी अरबको तेल कम्पनीमा इरानले नै हमला गरेको हो
फरकधार / भदौ ३०, २०७६

एजेन्सी– अमेरिकाले स्याटलाइट तस्वीरहरु सार्वजनिक गर्दै साउदी अरबको प्रमुख तेल कम्पनी अरामकोका दुई प्रशोधन केन्द्रमा आक्रमण हुनुको पछाडि इरानकै हात रहेको फेरि दाबी गरेको छ ।



स्याटलाइट तस्वीरमात्र होइन, यो जानकारीका लागि अमेरिकासँग जासूसी सूचना भएको पनि उसको दाबी छ ।

शनिबार साउदी अरबको तेल कम्पनीको प्रशोधन केन्द्रमा भएको आक्रमणमा आफ्नो संलग्नता नरहेको इरानले यसअघि पनि बताउँदै आएको छ । यो आक्रमणको जिम्मेवारी चाहिँ यमनको इरान समर्थित समूह हुथी विद्रोहीले लिइसकेको छ ।

यो आक्रमणपछि विश्वभर तेल आपूर्तिमा पाँच प्रतिशत कमी आएको छ । पेट्रोलियम पदार्थको मूल्य अब निकै बढ्न सक्ने अनुमान पनि गरिएको छ ।

अमेरिकी विदेशमन्त्री माइक पोम्पिओले गत साता नै यो आक्रमणमा इरान जिम्मेवार भएको आरोप लगाएका थिए । 

त्यसपछि आइतबार अमेरिकी राष्ट्रपति डोनाल्ड ट्रम्पले पनि ट्विट गरेर भने– यो आक्रमणमा संलग्नमाथि सैन्य कारवाही सुरु गर्ने चेतावनी दिएका थिए । 

अमेरिकी अधिकारीहरुले यस विषयमा नाम नखुलाउने सर्तमा न्युयोर्क टाइम्स, एबिसी तथा रोयटर्सका साथ यसका सूचना दिइरहेका छन् । एक अधिकारीले यो आक्रमण पश्चिम–उत्तर दिशाबाट भएको बताएका छन् । हुथी विद्रोहीले जिम्मेवारी लिए पनि उनीहरु दक्षिण पश्चिममा भएकाले यसमा इरानकै हात रहेको अमेरिकी दाबी दोहोरिएको हो ।

अहिले कच्चा तेलको मूल्य बढेर ६६.२८ डलर पुगेको छ । यो एकै दिनमा १० प्रतिशत वृद्धि हो । यसअघि सन् १९९१ मा भएको खाडी युद्धमा मात्र एकै पटकमा यति धेरै तेलको मूल्य बढेको थियो ।

अमेरिकाको यो ताजा आरोपबारे अहिलेसम्म इरानले कुनै प्रतिक्रिया दिएको छैन । तर, इरानका विदेशमन्त्री जव्वाद जरिफले आइतबार ट्विटमा नै अमेरिकी विदेशमन्त्रीमाथि आरोप लगाएका थिए ।

त्यसो त ट्रम्प प्रशासनले यसअघि घोषित नीति नै लिएको थियो कि इरानमाथि अधिकतम दबाबको अवस्था सिर्जना गर्ने । अमेरिकाको यो नीति इरानको परमाणु कार्यक्रममा अन्तर्राष्ट्रिय सम्झौताबाट अलग भएपछि अपनाएको थियो ।


यस विषयसँग सम्बन्धित समाचार

यो सामाग्री सेयर गर्नुहोस्


यो पनि नछुटाउनुहोस्