बोस्टन— अमेरिकामा मंगलबार र बुधबार भएका सवारी दुर्घटनामा दुई नेपालीको मृत्यु भएको छ । 

बुधबार केन्टकीमा भएको दुर्घटना र मंगलबार पेन्सलभेनियामा भएको दुर्घटनामा दुई नेपालीले ज्यान गुमाएका हुन् । केन्टकीमा नेपालबाट छोरीज्वाइँ भेट्न र घुम्न अमेरिका पुगेका विष्णुप्रसाद सापकोटाको निधन भएको हो । ५८ वर्षीय सापकोटा बाटो छेउमा हिँडिरहँदा एक गाडीले ठक्कर दिएको थियो ।

उनी महोत्तरीका हुन् । छोरीज्वाइँ भेट्न उनी ३ साताअघि मात्र अमेरिका पुगेका थिए । गाडीको ठक्करबाट गम्भीर घाइते उनको उपचारका क्रममा अस्पतालमा मृत्यु भएको हो ।

त्यस्तै, मंगलबार दुर्घटनामा परी नेपालीभाषी कर्णबहादुर सुवेदीको मृत्यु भएको हो । उनलाई पनि बाटो काट्दा गाडीले ठक्कर दिएको थियो । ६१ वर्षीय सुवेदी भुटानी शरणार्थीको पुनर्वास योजनाअनुसार सन् २०१२ मा अमेरिका पुगेका थिए ।