एजेन्सी– भारतकी पूर्वविदेशमन्त्री सुषमा स्वराजको मृत्युपछि उनकी छोरी बाँसुरी स्वराजले उनको अन्तिम एक इच्छा पूरा गरेकी छिन् ।

अगस्टमा आफ्नो निधनभन्दा केही घन्टाअघि मात्र सुषमाले आइसिजेमा कुलभूषण जाधवको मुद्दामा पैरवी गरिरहेका वकिल हरिश साल्वेलाई फोन गरेकी थिइन् । सुषमाको निधनपछि एक कार्यक्रममा साल्वेले भनेका थिए, ‘सुषमाले मलाई घर बोलाएकी थिइन्, आफ्नो एक रुपैयाँ फि लिएर जानु भनेकी थिइन् ।’

तर, यो काम पूरा गर्न सकिनन् सुषमाले । उनको निधन भयो । यही अधुरो कामलाई उनकी छोरीले पूरा गरेकी हुन् । सुषमा स्वराजका पति स्वराज कौशलले एउटा ट्विट गर्दै यसको जानकारी दिएका छन् ।

उनले लेखेका छन्, ‘सुषमा स्वराज, बाँसुरीले आज तिम्रो अन्तिम इच्छा पूरा गरिदिएकी छिन् । कुलभूषण जाधवको मुद्दाको फीको एक रुपैयाँ, जो तिमीले छोडेर गएकी छौ, बाँसुरीले आज साल्वेलाई भेटेर दिएकी छिन् ।’