काठमाडौं– सिङ्गापुरमा भइरहेको त्रिकोणात्मक टी–२० सिरिजमा नेपाल जिम्बाबेसँग पराजित भएको छ । सिंगापुरको इन्डियन एसोसियसन क्रिकेट मैदनमा भएको खेलमा नेपाल जिम्बाबेसँग ४० रनले पराजित भएको हो । 

टस हारेपछि ब्याटिङको निम्तो पाएको जिम्बाबेले २० ओभरमा ६ विकेट गुमाउँदै १६० रन बनाएको थियो । जिम्बाबेका लागि कप्तान सेन विलियम्सले ३५ बलमा ४ चौका र ३ छक्का प्रहार गर्दै सर्वाधिक ५३ रनको योगदान दिएका थिए । सिंगापुरको योगफलमा रायन बर्लले २८, पिटर मोरले २१, टिनोटेन्डा मुटोम्बादजीले २०, रिचमन्डले १७, रिग्स चकाभले ६ रन प्रहार गरे ।

नेपालका लागि सन्दीप लामिछाने र सोमपाल कामीले समान २ विकेट लिएका थिए । कप्तान पारस खड्का र अभिनास बोहराले १–१ विकेट लिए ।

१६१ रनको टार्गेट पाएर मैदानमा उत्रिएको नेपालले २० ओभरमा ९ विकेट गुमाएर १२० रनमात्र बनाउन सक्यो । नेपालका लागि विनोद भण्डारीले सर्वाधिक ३३ रनको योगदान दिए । आरिफ सेख २५, करण केसी १८, पारस खड्का १२, सोमपाल कामी ७, सन्दीप लामिछाने र कुशल मल्ल ५, दीपेन्द्र सिंह ऐरी ४, अभिनास बोहोरा ३ रनमा आउट भए । पवन सरार्फ र सुशन भारीले खाता खोल्न नै सकेनन् ।

जिम्बाबेका लागि सेन विलियम्सले ३, टिनोटेन्डाले २ विकेट लिए । नेपालले यो सिरिजमा अब सिंगापुरसँग एक खेल खेल्नेछ ।