एजेन्सी– अहिलेको समयमा पनि कुनै एउटा देशमा एउटा पनि एटिएम छैन वा सिम कार्ड लिन पाइँदैन भन्ने सुन्दा अचम्म लाग्न सक्छ । हो, कुनै गाउँमा एटिएम नहुनु एउटा कुरा हो । तर, जब सिंगो देशमा एउटा पनि एटिएम हुँदैन, त्यसलाई कसरी पत्याउने ? 

यो चाहिँ पत्याउनै पर्ने विषय हो । त्यस्तो देश हो, अफ्रिकाको इरिट्रिया । त्यहाँ एटिएममात्र होइन, ३७ हजार नेपाली रुपैयाँभन्दा धेरै बैंकबाट झिक्न पनि पाइँदैन । त्यस्तै, यो देशमा पनि सिम कार्ड पनि लिन पाइँदैन । अनि यही देशमा टिभीको एउटा मात्र च्यानल सन्चालनमा आएको छ । 

यो खासमा सन् १९९३ मा बनेको देश हो । इथियोपियाबाट स्वतन्त्र भएर बनेको यो देशमा अहिले पनि राष्ट्रपति अफेवेर्कीको बोलवाला छ । सरकारले देशमा अर्को पार्टी बनाउन पनि प्रतिबन्ध लगाएको छ । यहाँ आलोचकहरुलाई जेल पठाइन्छ र प्रत्येक युवाले सैन्य तालिम लिएकै हुनुपर्छ । 

इरिट्रियामा इन्टरनेटको पनि सहज सुविधा छैन । यो देशमा इन्टरनेटको प्रयोग १ प्रतिशत मानिसले मात्र गरिरहेका छन् । यहाँ बैंकमा जम्मा गरिएको पैसा पनि आफूले भनेजति निकाल्न मिल्दैन । सरकारले यस्तो नियम लगाउनु चाहिँ महंगी रोक्नका लागि हो भन्ने त्यहाँका जनताले बताउँदै आएका छन् । 

यो देशको जनसंख्या कति छ भन्ने पनि एकिन छैन । तर, विश्वका देशहरुमा जनसंख्याबारे हिसाब गरिरहेकाहरुले चाहिँ यहाँ ३५ लाख मानिस हुनसक्ने अनुमान गरेका छन् । तर, यो देशको राजधानी असमारा चाहिँ निकै लोभलाग्दो छ । यसको बनावट इटालीको जस्तो भएको मानिन्छ ।