काठमाडौं- चिकित्सा विज्ञान राष्ट्रिय  प्रतिष्ठान (न्याम्स)ले स्नातकोत्तर तहको एमडी–एमएस–एमडिएमएसको प्रवेश परीक्षा  यही कात्तिक ९ गते सञ्चालन गर्ने भएको छ ।

स्वास्थ्य तथा जनसंख्या मन्त्रालयले नयाँ शैक्षिक सत्र २०७६/७७ का लागि लिइने सो तहको प्रवेश परीक्षा स्थगन गर्न न्याम्सलाई यही १ कात्तिकमा निर्देशन दिएपछि  कात्तिक २ गते सञ्चालन गर्ने भनिएको सो तहको परीक्षा स्थगन भएको थियो । 

स्वास्थ्य तथा जनसंख्यामन्त्री न्याम्सको सहकुलपति हुने प्रावधान रहेको छ । न्याम्सका डिन प्रा.डा. पीयुष दाहालले मन्त्रालयको निर्देशनअनुसार कात्तिक ९ गते शनिबार प्रवेश परीक्षा सञ्चालन हुन लागेको जानकारी दिए ।

न्याम्सलाई नयाँ शैक्षिक सत्रका लागि  नेपाल मेडिकल काउन्सिलले एमडी–एमएस–एमडिएमएस ११५ र डिएम–एमसीएचतर्फ २१ सिट संख्या अध्ययन–अध्यापन गर्न स्वीकृति दिएको थियो ।