काठमाडौं– सञ्चार तथा सूचना प्रविधिमन्त्री एवं सरकारका प्रवक्ता गोकुलप्रसाद बाँस्कोटाले विप्लव समूहले हिंसा छाडे सबै कुरा समाधान हुने दाबी गरेका छन् । नेत्रविक्रम चन्द नेतृत्वको सो समूहले संविधान मानेर आए खेल खत्तम हुने बताएका हुन् ।

यसअघि विप्लव समूहले आफ्ना कार्यकर्तालाई रिहा गरेर प्रतिबन्ध हटाए वार्ता गर्ने सर्त राखेको थियो । सोही प्रसंगमा बाँस्कोटाले छद्मभेषी कुराका पछि सरकार नलाग्ने प्रतिक्रिया दिएका हुन् । 

हिंसा छाड्ने हो भने प्रतिबन्ध हटाइराख्नु नपर्ने उल्लेख गर्दै उनले संविधानले दिएको राजनीतिक अधिकारअनुसार विप्लव हिंसा छाडेर आउनुपर्ने बताए ।

हिंसा मच्चाउनु, विकास र प्रगतिको बाटो अवरूद्ध गर्नु, चन्दा संकलन अभियान चलाउन खोज्नुजस्ता क्रियाकलाप राष्ट्रघाती कदम भएको भन्दै उनले भने, ‘हामीले धेरै हिंसा देखिसक्यौँ, हिंसा छाडेर शान्ति रोजौँ ।’