काठमाडौं– संसद् सचिवालयकी कर्मचारी रोशनी शाहीले जबर्जस्ती करणी उद्योगमा उजुरी गरेपछि पक्राउ परेका निवर्तमान सभामुख कृष्णबहादुर महरामाथि लागेको बलात्कार प्रयास आरोपको अनुसन्धान प्रतिवेदन प्रहरीले जिल्ला सरकारी वकिलको कार्यालयमा बुझाएको छ ।
महानगरीय प्रहरी परिसर काठमाडौंकाअनुसार महराविरुद्धको अनुसन्धान प्रतिवेदन शुक्रबार दिउँसो जिल्ला सरकारी वकिलको कार्यालयमा बुझाइएको हो । प्रहरीले महरामाथि २० दिन लगाएर अनुसन्धान गरी तयार पारेको राय सहितको प्रतिवेदन जिल्ला सरकारी वकिल कार्यालयमा पेस गरेको हो ।
महरालाई मुलुकी अपराध संहिता ऐन २०७४ को बलात्कार प्रयास र यौन दुर्व्यवहारसम्बन्धी कसुरमा कैद तथा सजायको माग गरिएको छ । अब प्रहरी प्रतिवेदनको थप अध्ययन गरेर सरकारी वकिल कार्यालयले मुद्दा चलाउने वा नचलाउने निर्णय गर्नेछ ।
असोज १९ गते महरा सरकारी निवास बालुवाटारबाटै पक्राउ परेका थिए । घटनाको दुईदिनपछि असोज १४ गते महराले पदबाट राजीनामा दिएका थिए ।
फरकधारमा प्रकाशित कुनै समाचारमा तपाईंको गुनासो भए हामीलाई [email protected] मा इमेल गर्न सक्नुहुनेछ । यही इमेलमा तपाईंले आफ्नो विचार वा विश्लेषण, सल्लाह र सुझाव पनि पठाउन सक्नुहुनेछ । हामीसँग तपाईं फेसबुक, ट्विटर, इन्स्टाग्राम, युट्युबमा पनि जोडिन सक्नुहुन्छ ।