काठमाडौं– नवनियुक्त कृषि तथा पशुपक्षी विकासमन्त्री घनश्याम भुसालले कर्मचारीको सरुवा, बढुवालगायत हस्तक्षेपमा आफूलाई घृणा लाग्ने बताएका छन् । बिहीबार मन्त्रालयमा पदभार ग्रहणपछि बोल्दै उनले आफूले सरुवा, बढुवामा हस्तक्षेप नगर्ने बताएका हुन् ।

मन्त्री भुसालले कर्मचारीलाई आफ्नो जिम्मेवारी पूरा गर्न आग्रह गर्दै आफूले मन्त्रीको जिम्मेवारी पूरा गर्ने प्रतिबद्धता जनाए । पदभार ग्रहण कार्यक्रममा बोल्दै उनले आफूले कृषि मन्त्रालय रोजेरै आएको दाबी गरे । उनले भने,  ‘प्रधानमन्त्रीले पनि मुलुकको सबैभन्दा प्राथमिकताप्राप्त मन्त्रालय हो, तपाईंले जिम्मेवारी लिइदिनुस् भन्नुभयो, मैले स्वीकार गरेँ ।’

मन्त्री भुसाललाई निवर्तमान कृषिमन्त्री चक्रपाणि खनालले मन्त्रालयमै पुगेर बधाई दिए थिए । मन्त्री भुसालले पदभार ग्रहण गरेपछि कुनै पनि निर्णयमा हस्ताक्षर गरेनन् । यसअघि मनत्रीले पदभार ग्रहण गरेपछि निर्णयमा हस्ताक्षर गर्ने प्रचलन थियो ।