नयाँ दिल्ली– आर्थिक गतिविधिका हिसाबले ज्यादै महत्वपूर्ण राज्य महाराष्ट्रमा राष्ट्रपति शासन हटाएर रातारात सरकार बनाएको भाजपाले केही दिनमै सरकार छोड्नुपर्यो । 

विधानसभा निर्वाचनबाट सबैभन्दा ठूलो दल बने पनि सरकारका लागि चाहिने बहुमत जुटाउन नसकिरहेको भाजपाले निर्वाचनको एक महिनापछि एनसिपी नेता शरद पवारका भतिजा अजित पवारलाई उप–मुख्यमन्त्री बनाई सरकार निर्माण गरेको थियो । पार्टी लाइनविपरीत भाजपा सरकारका उप–मुख्यमन्त्री भएका अजितलाई एसिपीले कारबाही गर्नुको साटो फकाइफुल्याई पार्टीकै लाइनमा ल्याउने रणनीति लियो । 

फलस्वरुप, सरकार बनेको एक साता नबित्दै उनले उप–मुख्यमन्त्रीबाट राजीनामा दिए । अजितको राजीनामापछि बहुमत पुर्याउन नसक्ने भन्दै मुख्यमन्त्री देवेन्द्र फडणवीसले पनि मैदान छोडे । 

अब, महाराष्ट्रमा एनसिपी र कांग्रेसको सहयोगमा शिवसेना पार्टीले सरकार बनाउने भएको छ । योसँगै, केन्द्रमा बहुमतको सरकार चलाइरहेको भाजपाले एउटा महत्वपूर्ण राज्यको सत्ता गुमाएको छ । 

महाराष्ट्र भारतको आर्थिक गतिविधिको केन्द्र हो । आर्थिक राजधानी मानिने देशकै ठूलो सहर मुम्बई महाराष्ट्रमै पर्छ । महाराष्ट्रले भारतको कुल जिडिपीको १४ प्रतिशत हिस्सा ओगट्छ । 

देशका ४० प्रतिशतभन्दा बढी कर्पोरेट अफिस महाराष्ट्रमा छन् । चुनावी चन्दामा यिनको ठूलो योगदान रहन्छ । केन्द्रीय संसद् लोकसभामा उत्तर प्रदेशपछि सबैभन्दा धेरै ४८ सांसद महाराष्ट्रबाट चुनिन्छन् । त्यसैले पनि यो राज्य भारतीय राजनीतिमा अहम छ ।   

दुई वर्षअघि (सन् २०१७ मा) भारतको कुल आवाद क्षेत्रको ७२ प्रतिशत भागमा भाजपा नेतृत्वको एनडिए गठबन्धनको सरकार थियो । अहिले, एनडिएको सत्ता ४१ प्रतिशत भागमा खुम्चिएको छ । 

गएको ११ महिनामा एनडिए गठबन्धनले ४ ठूला राज्यमा सत्ता गुमायो । दुई साना राज्यमा सत्ता हासिल गर्यो । मध्य प्रदेश, राजस्थान, छत्तीसगढ र महाराष्ट्रको सत्ता गुमाएको एनडिएले मिजोरम र सिक्किममा सरकार बनायो ।

अहिले देशभरका १७ राज्यमा एनडिए सरकार छ । जसमध्ये, १३ राज्यमा भाजपाका मुख्यमन्त्री छन् भने ४ राज्यमा सहयोगी दलका मुख्यमन्त्री छन् । तमिलनाडुमा पनि भाजपा समर्थनको सरकार छ, तर विधानसभामा भाजपाले एक सिट पनि जितेको छैन ।