काठमाडौं— मनमोहन कार्डियोथोरासिक भास्कुलर तथा ट्रान्सप्लान्ट सेन्टरमा उपचाररत प्रधानमन्त्री केपी शर्मा ओलीले एक भिडियो सन्देश दिँदै आफू स्वस्थ रहेको जानकारी गराएका छन् । प्रधानमन्त्री ओलीको गत साता एपेन्डिसाइटिसको अप्रेसन गरिएको थियो ।
‘मेरो स्वास्थ्य राम्ररी सुधार भइरहेको छ,’ भिडियो सन्देशमा उनले भनेका छन्, ‘एउटा मेजर अप्रेसनपछि तपाईंहरु देखिरहनुभएको छ, म उठेर बोल्न सक्ने, साथीहरुसँग कुरा गर्न सक्ने अवस्थामा छु र समाचारहरु हेर्न सक्ने अवस्थामा छु ।’ भिडियो सन्देशमा प्रधानमन्त्री ओलीले आफूले १३ औं ‘साग’को उद्घाटन समारोह पूरै हेरेको बताए । उनले सागको उद्घाटन गरेकोमा राष्ट्रपतिलाई र सहभागी भएकोमा सबैलाई धन्यवाद दिएका छन् ।
भिडियो सन्देशको पूर्ण पाठ
एपेन्डिसाइटिस भनेको कसैलाई सुचना दिएर आउने रोग होइन । यो अचानक आइलाग्छ । मलाई पनि अप्रत्याशित रुपमा त्यसरी आइलाग्यो । यसमा इन्फेक्सन भएछ । र, त्यो बाहिर पनि फैलिएछ । त्यसमा मात्रै इन्फेक्सन सिमित भएको भए त्यसलाई निकालेर फाल्दा सजिलो हुन्थ्यो । बाहिर पनि इन्फेक्सन भएको हुनाले त्यसलाई पनि हटाएर फाल्नुपर्यो । त्यसकारण हप्ता–दस दिनको उपचारमा लाग्यो । तर, मेरो स्वास्थ्य राम्ररी अगाडि बढिराख्या छ, सुधार भइराख्या छ । र, एउटा मेजर अप्रेसनपछि अहिले तपाईंहरू देखिरहनुभएको छ कि अहिले मेजर अपरेसनपछि पनि म उठेर अहिले बोल्न सक्ने, साथीहरुसँग कुरा गर्न सक्ने भएको छु र कुरा गर्न सक्ने अवस्थामा छु र समाचारहरु हेर्न सक्ने अवस्थामा छु ।
हिजो मैले १३औँ सागको उद्घाटन समारोह पूरै हेरेँ । र, हुन सक्छ कि सक्दैन भन्ने द्विविधा समाप्त भएकोमा खुसी लाग्या छ । म राष्ट्रपतिज्यूलाई उद्घाटन गरिदिनुभएकोमा, अरु सबैलाई सहभागी हुनुभएकोमा धन्यवाद भन्न चाहन्छु । अब मैत्रीपूर्ण खेलबाट देशका इज्जत अगाडि बढाउन र क्षेत्रीय मित्रता अगाडि बढाउन म नेपाली खेलाडीहरु र सार्क क्षेत्रका खेलाडीहरु सबैलाई आग्रह गर्दछु ।
मेरो स्वास्थ्य अवस्थाको बारे जानकारी pic.twitter.com/vuOFOyhBte
— KP Sharma Oli (@PM_Nepal) December 2, 2019
फरकधारमा प्रकाशित कुनै समाचारमा तपाईंको गुनासो भए हामीलाई [email protected] मा इमेल गर्न सक्नुहुनेछ । यही इमेलमा तपाईंले आफ्नो विचार वा विश्लेषण, सल्लाह र सुझाव पनि पठाउन सक्नुहुनेछ । हामीसँग तपाईं फेसबुक, ट्विटर, इन्स्टाग्राम, युट्युबमा पनि जोडिन सक्नुहुन्छ ।